Чуаш Кичүе авылында яшәүче Сингатуллина Румия Рифкать кызына 13 февральдә 70 яшь тула

Безнең апабыз, нәселебезнең кояшы, әби-бабаларыбызның, дәү әтиебезнең нигез җылысын саклаучы, Чуаш Кичүе авылында гомер кичерүче Сингатуллина Румия Рифкать кызына 13 февральдә 70 яшь тула.
Румия апа һәр яктан талантлы кеше. Аның тормышка мәхәббәт тулы шигырьләре, моңлы җырлавы, эчтәлекле картиналары күп тапкырлар район, республика конкурсларында югары бәяләнү дә Румия апага Тәңре биргән сәләт турында сөйли. Барлык тормышын ул районыбыз халкын мәдәни яктан баетуга багышлады. Гәрчә аның сәләте карьера баскычында киң юл ачса да, Румия апа үзенең кече ватанына гына хезмәт итәргә теләде. Хезмәт кенәгәсендә бары бер генә язма – авыл һәм мәктәп китапханәсе мөдире!
Лаеклы ялга чыккач та ул авылдашларыбызга мөселман диненең канун-кагыйдәләрен төшендерүгә зур игътибар бирә, мәчеттә дини дәресләр алып бара. Әле шулай ук авылда яшәүче һәр династияне, аларның тарихын өйрәнеп белә, гаиләләрнең борынгы тормышын, нәсел шәжәрәсен торгызуда ярдәм итә. Румия апа – авылыбызда яшәүче иң олы һәм якын туганыбыз. Балачактан ук иң пөхтә, игътибарлы һәм рәхмәтле кыз булганга, әти-әниләребез, туганнарыбыз аны җылы итеп “Тәти апа” дип атыйлар.
Апабыз куллары белән пешерелгән тәмле ризыклар, өеннән туганнары һәм дусларының өзелеп тормавы аның искиткеч ачык һәм кунакчыл булуы турында сөйли. Тәти апа ике кыз тәрбияләп үстерде. Кызлары Рәмзия һәм Рузия аңа чиксез рәхмәтле һәм Әниләрен менә дигән оныклар һәм игътибар- ярату белән сөендерәләр.
Кадерле Румия апабыз! Чын күңелебездән гомер бәйрәмең белән тәбрикләп, нык саулык телибез. Синең нурлы күзләрең, йомшак кулларың безне озак еллар каршы алалар, изге догаларың тормыш юлына аерым мәгънә һәм матурлык биреп озатып йөриләр. Бәрәкәтле, хәрәкәтле тормыш, озын гомер телибез Сиңа!
Тирән  хөрмәт белән Мәскәүдән Айгөл.