Узган атнада Рөстәм Миңнеханов Татарстан Президенты вазыйфасына кереште. Казанда Салих Сәйдәшев исемендәге Зур концерт залында аның инаугурация тантанасы булды.
Рөстәм Миңнеханов Татарстанның күпмилләтле халкына тугры хезмәт итәргә, гражданнарның хокукларын һәм ирекләрен, Татарстан дәүләт суверенитетын тәэмин итәргә, үзенә йөкләнгән президентлык вазыйфаларын намус белән үтәргә ант итте. “Татарстанлыларның карарын кабул итеп, республика язмышы өчен республиканың һәр кешесе, киләчәк буын алдында тулы җаваплылык тойганымны аңлыйм”,–диде республика башлыгы.
