Әлки районы авылларына “тиз” интернет килә

Район электр элемтәсе узелы хезмәткәрләре бу көннәрдә Иске Әнҗерәгә җепселле элемтә кабельләре салалар.

Әлеге заманча элемтә кабельләре Иске Әнҗерәгә Борискино авылыннан җир астыннан сузыла. Аның озынлыгы 5,7 километр тәшкил итә. Элемтәчеләр шуның 4 километрын салганнар инде. Ә киләсе елда Иске Әнҗерә авылындагы өйләргә яңа кабель сузылачак. Авылга сыйфатлы элемтә килгәч, әнҗерәлеләр тиз интернеттан, кабельле телевидениедән файдалана алачак. 2017 елда шундый ук эшләрне Чиябаш һәм Түбән Әлморза авылларында башкару күздә тотыла.