Әлки районының Түбән Биктимер авылы клубы мөдире Руфия Мифтахованы зурлап лаеклы ялга озаттылар

Ноябрьнең буранлы бер кичендә Түбән Биктимер авылы халкы клубка үзенчәлекле тантанага җыелды.

Бу көнне мәдәният учагының хуҗабикәсе Руфия Мифтахованы олылап лаеклы ялга озаттылар. Клубта, кем әйтмешли, алма төшәрлек урын да юк иде. Авылдашлары, дуслары, туганнары һәм район үзәгеннән җитәкчеләр дә килде.

-Руфия ханым авылда мәдәният эше белән 22 ел җитәкчелек итте. Ул безнең иң тырыш һәм актив хезмәткәрләребезнең берсе булды,-диде район мәдәният бүлеге җитәкчесе Рәсимә Гайфуллина. - Авыл халкы өчен төрле кызыклы чаралар, концертлар оештырды, сәләтле авылдашларын үзешчән сәнгатькә җәлеп итә белде. Ул бик талантлы шәхес. Концертларда, конкурсларда бездә сирәк күренүче жанр - фокуслар күрсәтү белән шаккатыра иде.

Күпьеллык намуслы хезмәте өчен рәхмәт әйтеп, Рәсимә Гайфуллина, район башкарма комитеты җитәкчесе урынбасары Мария Платонова һәм район мәдәният йорты директоры Рөстәм Шәйхетдинов Руфия Мифтаховага Рәхмәт хаты, кыйммәтле бүләкләр тапшырдылар.

Руфия ханым үзе дә клубта эшләгәндәге уңышлар һәм авырлыклар турында сөйләп үтте, ремонттан соң өр-яңа төс алган клуб бинасын ачу сөенечен искә алды. Булышып, киңәшләр биреп торасын әйтеп, вазыйфасын ул Салават исемле егеткә тапшырды.

Руфия ханымга рәхмәт сүзләре һәм изге теләкләр концерт номерлары белән аралашып барды. Сәхнәдә аның авылдашлары һәм район мәдәният йорты үзешчән коллективы чыгыш ясады.