Әлки хәбәрләре
  • Рус Тат
  • Яңа уку елын – яңарган мәктәптә

    Борискино урта мәктәбе укучылары һәм укытучылары өчен Белем бәйрәме икеләтә сөенечле булды. Яңа уку елын алар яңарган мәктәптә каршы алдылар. Мәктәп бинасын бүген танырлык та түгел. 1982 елдан бирле рәтле ремонт күрмәгән мәктәп быел республиканың капиталь ремонт программасына кертелгән иде. Бүген анда яңа тормыш башланды. Ремонттан соң бинаны файдалана башлау...

    Борискино мәктәбен ремонтлау шактый катлаулы барды. "Строитель и К" төзүчеләре ремонт эшләренә март аенда ук керештеләр. Җәй әйләнәсе бик каударланмый гына әйбәтләп эшләп чыгарга иде ниятләре. Әмма җәй керүгә проблемалар башлана - ремонт эшләрен финанслау туктала. Район җитәкчелеге бу эшне кузгатып җибәрү өчен нык тырыша. Инде август аенда төзүчеләр бар көчне шушы объектка туплап, ремонтны яңа уку елына башкарып чыгалар.
    Биредә иртә таңнан соңга чаклы эш тынып тормый. Ремонтчылар саны берара 50 кешегә кадәр җитә. Нәтиҗәдә мәктәпнең түбәсе әйбәтләп ябыла, ишек-тәрәзәләр алыштырыла, идән, стеналар ясала. Җылыту системасы, электрүткәргечләр яңабаштан эшләнә. Күпме агач идән плитәгә алыштырыла. Бүген без ашханәгә шык-шык басып үттек. Ә бит бу бүлмәнең агач идәнен сүткәч, анда кеше буйламаслык баз булуы беленә. Балчык ташып, бетонлап плитә җәяләр. Төзүчеләр укытучылар коллективына да бик рәхмәтле. Директорыннан башлап һәр хезмәткәр көн-төн төяү, бушату, ташу, җыештыру эшләрендә катнашалар.
    Ә иң тырыш, оста төзүчеләрнең исемнәре тантанада да яңгырады. Бу Олег Аксенов, Петр Бухаров, Илсур Гәрәев, Алексей Скворцов, Әмир Фәттахов, Наил Хәбибрахманов, Равил Вәлиев, Александр Идамкин, Вәкил Мамедов һ.б. Төзүчеләрне җәй буе диярлек кайнар ашлар белән сыйлаган мәктәп пешекчеләре Наталья Потаповага һәм Валентина Ямушкинага да күп рәхмәтләр әйтелде.
    Биредә 454 квадрат метр мәйданда плитә җәелгән, 56 тәрәзә өч катлы пыялалы пластикка алыштырылган. Шулай ук 35 яңа ишек куелган, 4 урында җылы бәдрәф, юыну бүлмәләре ясалган. Класс һәм коридор стеналары, идәннәре, түшәмнәре зәвык белән ремонтланган.
    Борискино мәктәбе 192 укучыга исәпләп төзелгән. Биредә бүген 74 бала белем ала. Шушы ук бинада балалар бакчасы да урнашкан, анда 17 сабый тәрбияләнә.
    Белем бәйрәме тантанасында быел беренче сыйныфка баручы малайлар һәм кызларны алкышлар белән каршы алдык. Алар алтау. Укытучылары Марина Шамышева белән укучылар сафлары тирәли әйләнеп, беренчеләр түрдә үз урыннарын алдылар. Башлангыч сыйныфларга баручылар буш кул белән килмәгәннәр икән. Алар бик матур итеп шигырьләр сөйләделәр, җырладылар. Кыскасы, олылар каршында беренче имтиханны уңышлы тоттылар.
    Аннан сүз хөрмәтле кунакларга бирелде. Валентина Липужина үзе дә бүген оныгын Казанда беренче сыйныфка озаткан икән.
    - Белем ул - кешенең иң зур байлыгы. Мал-мөлкәт бер көндә юкка чыгарга мөмкин, ә белем гомерлек байлык, сезнең ышанычлы юлдашыгыз. Бүген беренче сыйныфка керүчеләргә мөрәҗәгать итеп әйтәм: сез инде мәктәпнең зур гаиләсенә кушылдыгыз. Укытучыларыгыз, әти-әниләрегез сезгә белем алуда ярдәм итәр, ә сез тырышып укыгыз. Балалар, һәркайсыгызга белем дөньясына хәерле юл сезгә, - диде Валентина Николаевна.
    Район башлыгы Фердинат Дәүләтшинга мәктәптә ремонт эшләренең барышын ахыргача контрольдә тотуы, һәрдаим ярдәм итүе өчен рәхмәтләр күп яңгырады. Фердинат Мидхәтович үз чыгышында:
    - Мин бу мәктәптә яхшы ремонт үткәрергә күптәннән хыялланган идем. Менә республикабыз җитәкчелеге ярдәме белән шул зур эшне башкарып чыктык. Армый-талмый хезмәт куйган төзүчеләргә, бик теләп ярдәм иткән мәктәп коллективына рәхмәт. Күмәк тырышлык нәтиҗәсе күз алдында - бина өр-яңа булды. Хәзер сезгә укытырга, балаларга белем алырга, спорт белән шөгыльләнергә зур мөмкинлекләр тудырылды. Бу мәктәптә илебезнең патриотлары, лаеклы гражданнары булырдай ышанычлы алмаш үссен иде, - диде.
    Менә дәрескә чакырып беренче кыңгырау яңгырады. Балалар якты, матур классларына таралды. Бүген мәктәптә беренче дәрес - парламент дәресе. Аны үткәрүдә кунаклар да катнашты.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: