Юхмачы авылында яшәүче ветеринария табибы Энҗе Төхвәтуллина ТНВ каналындагы “Башваткыч” тапшыруында катнашты

Яңа 2018 ел символы - этләргә багышланган әлеге тапшыру уенчылары ветеринария табиблары була. Аларның да иң-иңнәре сайлап алына.

Энҗе үзе Түбән Кама районының Үчкә авылы кызы. Казан ветеринария академиясендә укыганда алар Юхмачы егете Рамил белән танышып-дуслашып китәләр. Ә вузны тәмамлагач өйләнешеп, дипломлы яшь белгечләр булып районыбызга кайталар. Бүген алар Юхмачы ветеринария участогының белемле, өметле яшь табиблары, халык арасында да абруй казанып өлгерделәр. Яңа өй җиткереп, игезәк ул һәм кыз үстереп менә дигән итеп яшәп яталар.

Институтны кызыл дипломга тәмамлаган, үз эшен бик әйбәт белүче, әдәби әсәрләр укырга яратучы Энҗегә "Башваткыч" сорауларына җавап бирү катлаулы булмый. Кечкенәдән этләр ярата, аларның токымнары, үзенчәлекләре хакында да бик күп белә ул.

-Мин этләрне генә түгел, барлык хайваннарны яратам. Мал табибы профессиясен сайлавым да шуңадыр. Үземне белгәннән бирле йортыбызда эт асрадык. Хәзер дә этебез бар - лайка токымлы Аргун. Ирем Рамил бит ау белән мавыга. Аргуныбызга әле бер яшь тә юк. Бик уйнарга ярата, инде төрле командаларны үтәргә өйрәнеп килә. Барыбызны да үз итсә дә, Аргун нигездә Рамилгә буйсына. Бу гадәти хәл: этләр бит үзләренә лидер сайлыйлар. Эшебездә дә әледән-әле маэмайларны дәваларга туры килә. Хуҗалары еш кына аруландырырга да алып киләләр үзләрен. Мин алар белән мәш килергә бик яратам. Гомумән, эт бит гомергә кешенең тугрылыклы дусты булган. Шуңа да киләсе ел уңышлы, әйбәт булыр дип ышанам,-ди Энҗе.

Без әле биредә барлык серләрне дә ачып бетермәдек. ТНВ каналыннан 31 декабрьдә 18.15 сәгатьтә "Башваткыч" тапшыруын карарга онытмагыз.