Алпар мәктәбендә Бөек Ватан сугышы ветераны Фоат Әхмәтшин истәлегенә урам баскетболы ярышлары үткәрделәр
Турнир башланыр алдыннан катнашучылар алдында Иске Алпар авыл җирлеге башлыгы Ринас Сәлахов чыгыш ясады.
Ул авыл халкының батыр якташлары белән горурлануын, аның истәлекләрен кадерләп саклауларын әйтеп үтте. Әлеге чарага ветеранның кызлары Римма Фадеева һәм Роза Дәминова да чакырылган иде. Алар әтиләре истәлегенә спорт бәйрәме оештыручыларга рәхмәтләрен белдерделәр.
Ачык һавада узган уеннарда иң көчлеләр ачыкланды. Малайлар коллективлары арасында Иске Матак мәктәбе командасы иң яхшы нәтиҗәләргә иреште. Икенче урында – Нәби Дәүли исемендәге гимназия спортчылары, өченче – Базарлы Матак мәктәбенең яшь баскетболчылары.
Кызлар командалары арасында Алпар мәктәбе зур уңышка иреште. Көмеш медальләргә – гимназия кызлары, бронзага Базарлы Матак мәктәбе укучылары лаек булды. Иске Алпардан Алия Дәүләтшина һәм Иске Матактан Петр Абасев турнирның иң яхшы уенчылары булып танылды. Җиңүчеләргә һәм призерларга кубоклар, мактау кәгазьләре тапшырылды, аннан соң һәркемне бәйрәм табынына чакырдылар. Чараны оештыруда ветеранның туганнары да спонсорлык ярдәме күрсәткән.
Әхмәтшин Фоат Вәли улы, хәрби училище тәмамлап, 17 яшендә кече лейтенант званиесендә фронтка җибәрелә. Кыю егет ике тапкыр Кызыл Йолдыз ордены белән бүләкләнә. Ул шулай ук Ватан сугышы ордены кавалеры. Офицер Әхмәтшин Бөек Җиңүне Берлинда каршылый. Берничә мәртәбә яраланган булса да, ул хәрби хезмәтен дәвам итә һәм туган ягына 1947 елда гына кайта. Аны КПССның Әлки райкомы пропагандисты итеп билгелиләр. Ә аннан соң Фоат Әхмәтшин ВЛКСМ райкомының беренче секретаре итеп сайлана. 1957-62 елларда КПСС райкомының оештыру бүлеге җитәкчесе вазыйфасын били. Лаеклы ялга кадәр ул партия райкомының икенче секретаре булып эшли. Фоат Әхмәтшин 1990 елның 6 маенда вафат була.
Иң мөһим һәм кызыклы язмаларны Татмедиа Telegram-каналында укыгыз
