Үткән атнада "Алинә" универсаль спорт залында өстәл теннисы буенча район турниры булды. Әлеге бәйге "Бердәм Россия" партиясе төзелүгә 10 ел тулу хөрмәтенә үткәрелде.
Ярышларда мәктәп укучылары, авыл яшьләре, инвалидлар җәмгыяте әгъзалары - һәр мәктәптән һәм авыл җирлегеннән икешәр егет һәм кыз катнашты. Урта Әлки, Карга, Түбән Әлки, Иске Матак, Чуаш Кичүе мәктәпләре укучылары аеруча осталык күрсәтте.
Мәктәп укучылары (кызлар) арасында беренче урынны Чуаш Кичүеннән Альбина Хөсәенова, икенче урынны Иске Матактан Дина Демидова, өченче урынны Чуаш Кичүеннән Айгөл Мусина алды. Егетләр арасында Иске Матактан Антон Леонтьев - беренче, Каргадан Айнур Вәлиев - икенче, Чуаш Кичүеннән Илназ Мусин өченче булды.
Авыл яшьләре (хатын-кызлар) арасында иң зур осталыкны Базарлы Матактан Анна Чуманова күрсәтте. Икенче - Түбән Әлкидән Алина Шилкова, өченче урында - агрокөллият филиалыннан Гөлназ Галиева.
Ир-егетләр арасында беренче урынны Иске Матактан Владимир Лычников, икенче урынны Базарлы Матактан Рәмис Ситдиков, өченче урынны Түбән Әлкидән Нияз Гирфанов яулады.
Инвалидлар һәм ветераннар арасында Базарлы Матактан Илшат Фәхриев, Каргадан Фәнис Низамов һәм Базарлы Матактан Әнвәр Галимов призлы урыннар алдылар. Шуны әйтергә кирәк, инвалидлар теннис спортын бик яраталар, республика ярышларында катнашып алдынгы урыннар алалар. Әйтик, Илшат Фәхриев ел саен республика бәйгесеннән алдынгылыкны алып кайта.
Ә менә район мәктәпләрендә, яхшы спорт заллары булса да, бу төр спортны үстерүгә тиешле әһәмият бирелми. Бу бигрәк тә Юхмачы, Хузангай, Иске Салман, Кошки, Төгәлбәй мәктәпләренә кагыла. Ә бит теннис өчен әллә ни зур чыгымнар да кирәкми.
Турнирда команда зачетында Чуаш Кичүе мәктәбе беренче, Иске Матак - икенче, Карга мәктәбе өченче урынны алдылар. Ә авыл җирлекләре арасында Базарлы Матак - беренче, Иске Матак - икенче, Түбән Әлки өченче булды.
Иң мөһим һәм кызыклы язмаларны Татмедиа Telegram-каналында укыгыз
