Төзелеш һәм ремонт эшләре дәвам итә

Юхмачы авылындагы балалар бакчасында ремонт бара: бинаның түбәсе алыштырылды, аңа өр-яңа пластик тәрәзәләр, ишекләр куелды, идәннәр дә яңа баштан җәелде. Инде стенасы да тышкы яктан сайдинг белән тышлана.

Шул ук вакытта эчке бизәү эшләре дә башкарыла. Барлык ремонт эшләренең гомуми бәясе 6 миллион сум тәшкил итәчәк.

Район үзәк хастаханәсенең поликлиника бүлегендә дә ремонт дәвам итә. Биредә барлыгы 26,6 миллион сумлык эш башкарасы бар. Бу сумманың 6 миллион сумы киләчәктә балалар авырулары бүлекчәсе урнашачак янкорма төзүгә, 4,5 миллион сумы җиһазлар сатып алуга тотылачак.