Алимент түләмәгән өчен бер әлкиле суд каршына басты

Ләкин төзәтү эшләренә хөкем ителүчеләрнең күпчелеге әлеге җәзаны үтүдән тайчаналар. Сәер, билгеле, әмма бу алар өчен кулайрак та. Әйтик, иң зур срокка - ике елга төзәтү эшләренә хөкем ителгән очракта да закон нигезендә бу 8 айга иректән мәхрүм итүгә алыштырылырга мөмкин. Алар җәза срогын үтәсе колония-поселениедән шартлы рәвештә вакытыннан алда азат ителү ихтималы да бар. Шул рәвешле, дүрт айдан инде алар иреккә чыгарылырга да мөмкин.

Балаларына алиментлар түләүдән усалларча тайчанган өчен Әлки районының 1 нче суд участогы җәмәгать судьясы карары белән хөкем ителгән С.да шулай уйлаган булса кирәк. Урта Әлки авылында яшәүче әлеге бәндәне суд хезмәт хакының 15 процентын дәүләт файдасына тотып калу юлы белән җиде айга төзәтү эшләренә юллаган иде.

Судның иректә калдыруына, төзәлергә мөмкинлек бирүенә шатланырга да бит югыйсә, әмма С. туры юлга басу турында уйлап та карамый.

Җинаять җәзаларын үтәтү инспекциясе С.ны төзәтү эшләре срогын узу өчен "Яшь Көч", "Хузангай" җаваплылыгы чикләнгән җәмгыятьләренә, "ВостокЗернопродукт" АҖ гә юллады. Әмма ул закон белән билгеләнгән срокта әлеге оешмаларга килеп тә карамады.

С. белән профилактик әңгәмәләр үткәрелде, суд белән билгеләнгән төзәтү эшләрен тиешенчә башкармаса, моның катырак җәзага алыштырылачагы хакында кат-кат кисәтелде. Әмма ул инспекция хезмәткәрләренең сүзләрен тыңларга теләмәде, эшләүдән баш тартты, эчеп-исереп йөрүен дәвам итте. Яшәү урынында да үзен гел начар яктан күрсәтте.

Нәтиҗәдә җинаять җәзаларын үтәтү инспекциясе С.га карата төзәтү эшләрен иректән мәхрүм итүгә алыштыру хакындагы күрсәтнамәне судка юллады.

8 июньдә 1 нче суд участогы җәмәгать судьясы әлеге күрсәтнамәне канәгатьләндерде. С. иректән мәхрүм итүгә хөкем ителде. Җәза срогын ул колония-поселениедә узачак. Бәлки анда үзенең кылганнары, киләчәк тормышы хакында уйланыр, нәтиҗәләр ясар.

Айрат Гибадуллин,

район җинаять җәзаларын үтәтү инспекциясе начальнигы.