Әлки районында Яңа ел бәйрәмнәрендә медицина хезмәткәрләре көчәйтелгән режимда эшләде

Район үзәк хастаханәсенең кабул итү-диагностика бүлеге җитәкчесе Игорь Леонтьев әйтүенчә, бәйрәмнәрдә "Ашыгыч ярдәм" хезмәтенә мөрәҗәгатьләр гадәти көннәрдәгедән күбрәк булган. Елның беренче атнасында 246 авыруга тәҗел медицина ярдәме күрсәтелгән. Бәрелеп-сугылып имгәнгән, аяк-куллары сынган байтак пациентларга ярдәм иткәннәр. Һава торышының еш үзгәреп торуы аркасында урамнар, юллар тоташ бозлавыкка әйләнде шул. Тешләре сызлап килүчеләр шактый булган. Бәйрәмнәрдә артыгын ашау, спиртлы эчемлекләрне күп куллану да үзенекен иткән - гастрит, холецистит, панкреатит, гипертония кебек хроник чирләре кискенләшеп медикларга мөрәҗәгать итүчеләр ешайган. Чирлеләрнең барысына да тиешле ярдәм күрсәтелгән. Бәйрәм көннәрендә поликлиникада да табиблар авыруларны кабул итте. Ә гомумән алганда бәйрәмнәр имин үткән, авыр очраклар теркәлмәгән.