Әлки районыннан Дмитрий Матюшкин һәм Раил Габдрахманов язмышларын армия белән бәйләгәннәр. ФОТО

Ә бит күп кенә әлкилеләр Россия Кораллы көчләре сафларында контракт буенча хезмәт итәләр, ягъни хәрби хезмәтне гомерләренең күпмедер өлеше өчен һөнәр итеп сайлыйлар.

Мәктәптән соң хәрби училищеларда белем алып, язмышларын армия белән бәйләүче егетләребез дә аз түгел. Алар инде үзләре солдатларга «ата», төрле дәрәҗәдәге командир буларак, илебез чикләренең кагылгысызлыгы, Ватаныбыз иминлеге сагында торалар.

"Хәрби корабта диңгезләр гизәсем килде"

Дмитрий Матюшкинга әле егерме бер яшь кенә. Әмма ул инде мәктәптән соң училище тәмамлап, эретеп ябышты­ру производствосы технигы һөнәрен үзләштерергә дә, сөеклесе Настяга өйләнеп, әти булырга да, Ерак Көнчыгышка китеп, контракт буенча сигез ай хезмәт итәргә дә өлгергән.

-Ничек болай килеп чык­ты соң, кай арада өлгердең?- дигән сорауга ул менә нәрсәләр сөйләде:

-Училище тәмамлагач, Ка­занга барып эшкә урнашырга уйладым. Ике куллап алалар, әмма хәрби билетны сорыйлар. Ә мин бит әле армиядә хезмәт итмәдем! Матакка кайттым, электр челтәрләренә эш сорап бардым. Бик әйбәт, алабыз, ләкин армиягә китеп барсаң? Син, егет, бу проблемаңны хәл ит инде, диделәр. Киттем хәрби комиссариатка. Ә анда миннән олыраклар армиягә җибәрүне көтеп яталар. Шунда хәрби комиссар Виктор Лав­рентьев әйтте: "Дима, техни­кум я институт бетерүчеләр өчен яңа мөмкинлек бар - ча­кырылыш буенча түгел, кон­трактлы хезмәткә китәргә була. Дөрес, бер түгел, ике елга. Әмма бит хезмәт хакы алып, социаль гарантияләрдән фай­даланып хезмәт итәсең". Уй­лап карадым, үземнекеләр белән киңәшләштем дә, тәвәккәлләргә булдым. Бик тә таулы-диңгезле якларны күрәсем килгән иде, шуңа күрә Камчатканы, Сахалин өлкәсен сайладым.

Шулай итеп, Дмитрий дус- ты Булат Юмагулов белән илебезнең иң ерак ноктасы­на юл ала. Гомерендә беренче тапкыр самолетта очып, хезмәт итәсе частена барып җитә.

-Килеп төштек. Андагы ма­турлыкка таң калдым. Вулкан­нар, кайнар чишмәләр, океан! Яр буенда диңгез арысланна­ры, океанда дельфиннар, әллә нинди балыклар. Һавасы да бөтенләй бүтән!-ди егет.

Контракт белән хезмәт итәргә килгән егетләрне бик әйбәт каршылыйлар, ә дүрт көн үтүгә Дима беренче тап­кыр катер-тральщикта рейдка чыга. Билгеле, яңа тормышка күнегүләре ансат булмый. Әмма офицерларның яшь матрослар­га булган әйбәт мөгамәләсе яңа шартларга күнәргә, кирәк нәрсәләргә өйрәнергә ярдәм итә.

-Корабльдә башкача бул­мыйдыр да ул, анда бер гаиләдәй яшәмәсәң, хезмәт итү мөмкин дә түгелдер. Тирә- ягыңда күз күреме дәһшәтле океан гына. Бер-береңне кай­гырту - шушы океанда исән- сау йөрү, илнең диңгез буе чикләрен ышанычлы саклау шарты да әле ул,-ди Дмитрий, тәҗрибәле диңгезчедәй фикер йөртеп.

Иске Тахталада, әти-әнисе янында, аны хатыны Настя һәм кечкенә кызы көтә. Февральдә Дмитрий Матюшкин ялга кайт- ты. Билгеле, гаиләсеннән баш­ка яшәү аңа ансат түгел. Әмма егет киләчәген диңгез флоты белән озакка бәйләү турында уйлана, шуңа гаиләсен дә үзе белән алып китмәкче. Ә нәрсә, алга таба укырга да, гаиләң белән яшәргә дә бөтен шартлар тудырылган. Бәлки озак та үтмәс, Дмитрий Матюшкин ка­питан булып, үзе корабль штур­валы артына басар әле…

Танклар биатлонында катнашкан якташыбыз

Раил киләчәктә кем булырга дип баш ватмый, хәрби комис­сариатта эшләүче абыйсы аңа акыллы киңәш бирә - хәрби училищеда укып, офицер бу­лырга. Дус-туганнары арасында инде Россия армиясе офицеры булып ирешкән егетләр дә бар. Бала чагыннан спортны яраткан, холкында мөстәкыйльлек, үз дигәненә ирешә белү кебек сыйфатлар өстенлек иткән егет Казан танк училищесына укыр­га керә. Башта авыр була, би­лгеле, тора-бара даими физик әзерлекне дә җиңел үтә, матема­тика, тактика кебек фәннәрне дә үзләштерә, танк йөртү серләренә дә төшенә.

2010 елда училищены тәмамлап, яшь лейтенант Раил Габдрахманов взвод команди­ры вазыйфасында Новосибир­скидагы хәрби частьта хезмәт итә башлый. Ике елдан аны Алтайга күчерәләр. Хәзер инде ул капитан, танк ротасы белән җитәкчелек итә. Чираттагы ялы вакытында Раил редакциягә кереп чыкты һәм ничек хезмәт итүе турында сөйләп исне китәрде.

-Саклану министры булып Сергей Шойгу эшли башлагач, армиягә игътибар нык артты, тәэминат яхшырды. Яңа танк- лар үзләштерәбез, өйрәнүләр даими үткәрелә, таләпләр кы­рыслана. Нәтиҗәдә солдат һәм офицерларның осталыгы үсә, тәҗрибәсе ныгый. Ишеткән- күргәнегез бар микән танк би­атлоны дигән ярышларны? Аларны әзерләү һәм үткәрүдә без дә катнаштык, ярышларның Россия этабында өченче урын алдык. Дөнья чемпионатын та­машачы буларак кына карасак та, чит ил командаларын безнең шартларга өйрәтүдә турыдан- туры катнаштым. Мондый ярышлар да танк гаскәрләрен камилләштерүгә хезмәт итә, - диде ул.

Яшь булса да, якташыбыз­га армия хезмәтендә шактый күрергә-кичерергә туры килгән инде. 2012 елда Ульяновск өлкәсендә хәрби базада шар­тлау булгач, снарядларны зарар­сызландыруда катнаша ул һәм дәүләт бүләгенә лаек була.

"Сугышчан хезмәттәшлекне ныгыткан өчен" медален танк биатлоны ярышларына 17 илдән килгән 54 команданы әзерләшкән өчен бирәләр. Бүген капитан Раил Габдрахманов - гвардияче, II класслы белгеч, әйткәнемчә, рота командиры.

- Ә хыяллар?-дигән соравы­ма:

- Академиядә укып, белемнәрне арттыру, лаеклы хезмәт итү, - дип җавап бирде егет.

Тормышыннан, язмышының шулай бер эздән баруыннан канәгать ул. Киләчәктә офи­цер булырга хыялланучы­ларга киңәше мондый: спорт белән физик яктан чыныгыр­га, рухыңны ныгытырга, кыю, тәвәккәл булырга гына кирәк. Ә хәрби кешенең тормыш- көнкүрешен дәүләт кайгырта. Раил әнә Казанда хәрби ипоте­ка шартларында фатир да алып куйган.

- Миңа армиядәге тот­рыклылык ошый: хезмәт ха­клары, сәламәтлекне саклау һәм ныгыту, белемне арттыру мөмкинлекләре, гаиләң өчен ти­ешле шартлар - барысы да бар. Киләчәген армия белән бәйләргә теләгән егетләргә, рәхим итегез, дип кенә әйтәсем килә,-дип ышандыра Раил.

Менә шундый егетләребез бар Россия армиясендә. Үз-үзенә, максатына нык ышана алар. Бәлки әле берсе генерал, бер­се адмирал булып ирешерләр. Уңышлар сезгә, Әлки уллары!