Әлки районының Үргәгар авылы күренешләрен дөньяның төрле илләреннән килгән рәссамнар картинага төшерде. ФОТО

  Төрле илләрдән профессиональ иҗатчылар һәм сынлы сәнгать серләрен үзләштерүче үзебезнең малайлар-кызлар авыл күренешләрен рәсемгә төшерделәр.

Шул тиклем рәссамнар Үргәгаргә ничек килеп чык­каннар, дисезме? Бу хакта безгә делегациянең җитәкчесе Екатерина Манько сөйләде.

–24 августтан 2 сентябрьгә кадәр республикабызда “Гүзәл Татарстан” дип аталган бе­ренче Халыкара рәссамнар симпозиумы эшли, –ди ул. –Татарстан бит икътисад­та, спортта, туризмда, IТ- технологияләрдә Россиядә лидерлар рәтендә. Инде менә без беренче мәртәбә сынлы сәнгать өлкәсендә дә халыка­ра мәдәни хезмәттәшлекне җәелдереп җибәрдек. Сим­позиумга дөньяның биш иленнән 15 рәссам килде. Без алар белән Казанда, шулай ук ЮНЕСКО Бөтендөнья ми­расы объектлары Болгарда, Свияжск утрау-шәһәрчегендә экскурсияләрдә булдык.

Екатерина Манько, әле яшь кенә булса да, исеме танылган талантлы рәссам. Ул Россия Рәссамнар берлегенең Татарс­тандагы яшьләр секциясе белән җитәкчелек итә. Илебезнең бик күп шәһәрләрендә шәхси күргәзмәләре оештырылган. Бу искиткеч сөйкемле һәм ягымлы, аралашучан кыз Та­тарстан Яшьләр хөкүмәте әгъзасы да икән. Алар анда райондашыбыз Олег Нико­шин белән бергә эшлиләр. Олегның чакыруы буенча Яшьләр хөкүмәте әгъзалары быел яз районыбызда булган­нар, мәктәп укучылары, авыл яшьләре белән очрашулар үткәргәннәр иде.

–Монда безне бик яхшы каршы алдылар. Әлкилеләрнең кунакчыллыгына, ихласлыгы­на исебез китте. Симпозиумга килгән рәссамнарның Татарс­тан белән, биредәге авыллар, татарларның милли колори­ты белән якыннан танышыр­га теләвен истә тотып, без аларны сезнең районга алып килергә уйладык. Бу юлы да делегациябезне кочак җәеп каршыладылар, эшләү өчен бөтен мөмкинлекләрне тудыр­дылар. Әлки халкына без бик рәхмәтле,–дип тәэсирләрен уртаклашты Екатерина Мань­ко.

Безгә килгән 13 рәссамның һәммәсе профессионаллар һәм үз илләрендә иң яхшы­лардан. Алар Черногория, Латвия, Литва, Казахстан дәүләтләреннән һәм Фин­ляндия, Израиль рәссамнар берлекләре вәкилләре. Берничәсе Мәскәү, Санкт-Пе­тербург шәһәрләреннән.

Рәссамнар районыбыздагы иң “өлкән” мәчетне күрсәтүне сораганнар. Һәм аларны 100 елдан артык тарихы бул­ган Үргәгар мәчетенә алып килделәр. Кунакларны район башкарма комитеты эшләре идарәчесе Елена Бухарова оза­тып йөрде.

Сәнгать осталарын мон­да мольбертлар каршында утыручы балалар көтә иде инде. Болар – балалар иҗат йортының Гөлфия Билало­ва җитәкчелегендәге рәсем берләшмәсенә йөрүче укучы­лар.

Танышып-сөйләшеп алгач, һәммәсе эшкә кереште. Рәссамнар, төрле тарафлар­га урнашып, кайсы мәчетне, кайсы яшел чирәмле авыл урамын, кайсы капка төбендә трактор торган йорт һәм ты­крыкны карандаш, пумала­лар белән сурәткә төшерә дә башлады. Беруңайдан бала­лар белән мастер-класс та үткәрделәр – рәсемне җанлы һәм дөрес итеп ясау серләре белән уртаклаштылар.

Талантлы шәхесләр гади, ихлас та була бит – кайсы янына килсәк тә, рәссамнар ачылып китеп сөйләштеләр, тәэсирләре белән бик теләп уртаклаштылар.

–Минем әле татар авылын­да беренче булуым. Биредәге бөтен нәрсә кызыклы, ма­выктыргыч безнең өчен. Та­тарстандагы авылларның төзеклегенә, муллыгына сокланмый мөмкин түгел. Россиянең күп кенә бүтән төбәкләрендә бит салалар бик начар хәлдә. Ә биредә йортлар зур, матур, яшеллек, чәчәкләр күп, урамнар чиста,–ди Петер­бургта һәм Финляндиядә иҗат итүче Ольга Копеина.

Үргәгарнең мәчет урамы аерым да ямьле шул – ул ир­кен болынга тоташа, уртасын­нан асфальт юл үтә. Һәр авы­лга табигый газ кергәнгә дә гаҗәпләнде кунаклар.

–Мин Кырым татарларын гына белә идем. Татарстанда халык бик ачык, кунакчыл, мул тормышта яши икән. Респу­блика безгә бик ошады,–дип фикерләрен җиткерде Черно­гория рәссаме Бэлис Поятич.

Берничә сәгатькә су­зылган иҗат “дәресе” ба­рышында профессиональ һәм яшь рәссамнар алдын­дагы ак кәгазь битләрендә Үргәгар авылының күркәм күренешләре пәйда булды. Кунаклар, балалар рәсемнәре белән танышып, аларга әйбәт бәя бирделәр. Педагог Гөлфия Билаловадан: “Сездә сәнгать мәктәбеме әллә?”– дип тә сорадылар. “Юк, ба­лалар иҗат йортындагы түгәрәктә шөгыльләнәбез”,– дигәч, гаҗәпләнеп тә куй­дылар, “Балаларның осталык дәрәҗәсе гаять юга­ры”,–диделәр.

Алинә Сәгыйтова һәм Мак­сим Яковлевның рәсемнәрен иҗат әһелләре аеруча ошат­ты. Аларның эшләрен мактап, истәлекле бүләкләр дә тап­шырдылар.

“Гүзәл Татарстан” сим­позиумында катнашкан рәссамнарның республикабы­зда ясаган картиналарыннан озакламый Казанда күргәзмә оештырылачак икән. Анда кәгазьгә, киндергә күчерелгән районыбыз күренешләре дә булачак. Гөлфия Билалова шәкертләре белән бергә әлеге күргәзмәне тамаша кылырга ниятләп торалар.