Районда ел башыннан бирле 114 кешегә карата материаллар судка юлланган

 
Юл хәрәкәте кагыйдәләрен бозу күп очракта административ чара күрүгә китерә. Мондый бозулар өчен башлыча штраф салына. Ә штрафны түләү өчен закон белән ике ай вакыт билгеләнгән. Шушы срокта штрафын түләмәүчеләр өчен  административ җаваплылык каралган. Бу – 15 тәүлеккә кадәр кулга алу, 50 сәгатькәчә мәҗбүри эшләр һәм түләнмәгән штрафның икеләтә күләмендә штраф салу.
Район ЮХИДИ бүлекчәсе начальнигы Рәис Сафин хәбәр итүенчә, штрафын вакытында түләмәүчеләрнең 13 ен суд административ кулга алуга, 22 сен мәҗбүри эшләргә хөкем иткән. Әҗәтле 45 кешегә  штрафларын икеләтә арттырып түләргә туры киләчәк. Штраф бурычлары 10 мең сумнан артып китүчеләр исә билгесез срокка транспорт йөртү таныклыкларыннан да мәхрүм ителергә мөмкин.