Базарлы Матак авылыннан бер ханым юлны төзекләндерүне сорап Идел буе Федераль округындагы вәкаләтле вәкиленә мөрәҗәгать иткән

Россия Президентының Идел буе Федераль округындагы вәкаләтле вәкиленә бер ханым Базарлы Матак авылындагы юлны ремонтлауны хәл итүдә булышуын сорап мөрәҗәгать иткән.

Ул юл полотносының бик нык тузуын һәм төзекләндерүгә мохтаҗ булуын әйткән. Әлеге сорау Россия Президентының Идел буе Федераль округындагы вәкаләтле вәкиле ярдәмчесе Алексей Симоновның 31 гыйнварда Түбән Новгородта кешеләрне кабул итүе вакытында каралган. Әлеге чарада Татарстанның транспорт һәм юл хуҗалыгы министры урынбасары Артем Чуркин һәм районыбыз башлыгы Александр Никошин да катнашкан. Артем Чуркин Базарлы Матактагы әлеге юлны ремонтлауның республика программасына кертелүен хәбәр иткән. Юлны төзекләндерү төбәк бюджеты средстволары хисабына быелның өченче кварталында башкарылачак.