Әлки районы гражданлык сагы идарәсе җитәкчесе Лилия Гайфуллина: “Карның көпшәклеге, эрегән карның җиргә сеңә баруы сәбәпле көчле язгы ташу булмады”

“Быел язгы суларны күрми дә калдык”, дип аптыраучылар байтак. Авыл урамнарыннан челтерәп гөрләвекләр дә акмады.

–Гомер булмаганны, быел авылыбызның Тегермән урамын су басмады. 53 ел яшәп, мондый язны хәтерләмим,–ди Иске Камка авыл җирлеге башлыгы Фәргать ӘКБӘРОВ. –Елның-елында Кече Чирмешән ярларыннан чыгып, су үзәнлекләргә җәелә, урам авылдан бүленеп кала иде. Ким дигәндә өч көн, ә кайсы елларны атна буе  14 йортлы Тегермән урамында яшәүчеләрне “зур җиргә” көймә белән йөртә идек. Ә быел әзерләнгән көймәләр “эшсез” калды, халык резин итекләр белән генә йөреп торды. Әлеге урамга җиңел машина юлы да бер генә көнгә дә өзелмәде. Алай гынамы, гөрләвекләрне дә күрмәдек быел. Ә бит кырларда кар бик күп иде. Ярый, иң мөһиме, кешеләрнең зыян күрмәве. Яз да матур булсын, җәйләр дә имин килсен, игеннәр күкрәп уңсын!

Район гражданлык сагы идарәсе җитәкчесе Лилия ГАЙФУЛЛИНА да җиде ел бу вазыйфада эшләве дәверендә мондый ташусыз язның беренче булуын әйтә.

–Быел  бер генә авылда да язгы ташулар белән бәйле су басу очрагы күзәтелмәде. Елга-сулыкларның 6,5 метрга күтәрелүе критик күрсәткеч булып санала. Ә бездә елга сулары 5 метрдан артык күтәрелмәде. Кече Чирмешән, Актай елгалары инде ярларына төште,–дип сөйләде безгә Лилия Гайфуллина.

Мул сулы язны көтүебезнең чынга ашмавын ул болай дип аңлата:

–Кар күп яуса да, ул йомшак, көпшәк, сусыз иде. Шуңа кар сулары күп булмады. Һаваның кисәк җылытып җибәрмәве дә үзенекен итте. Көндезләрен кояш мул җылытса да, төннәрен температура төште. Җирләр туң булмау сәбәпле, эрегән кар сулары туфракка сеңә барды.

–Язгы ташу чорлары имин генә узды. Хәзер инде безнең төп бурыч – ут-күзне булдырмау, урманнарны янгыннардан саклау,–ди Лилия Гайфуллина.