Әлки районы: хуҗалыкка комбайн, гаиләгә 100 мең сум премия

Әлеге бөртек суктыру комбайны соңгы ун елда ватык хәлдә басып торган. Ә төзексез техникадан еш кына кирәкле запас частьләрен дә сүтеп алалар. Инде таралып бетә язган комбайнны гамәлдән чыгарырга җыенган булалар. Виктор Мукусев, “иске яңаны саклый” дигән әйтемне искә алып, комбайнны ремонтлауга керешә. Кирәкле детальләрне хуҗалык белгече Сергей Еликов Ростов-Дон шәһәреннән төяп кайта. Берничә атна дигәндә “Дон”га янә “җан керә”. Миллионлаган сум торган, инде өченче дистә “яше” белән барган комбайн арпа суктыруга керешә.

“Хузангай” җәмгыяте инвесторы Иван Казанков урак барган кырга килеп, алтын куллы комбайнчыга мактау сүзләре белән рәхмәт җиткерә. Алай гына да түгел, кыйммәтле техниканы сафка бастырганы өчен Виктор Мукусевка ул 100 мең сум акчалата премия тапшыра.