Әлки районы Түбән Колчурино авылында Федор Варламов кече ферма төзи

Варламовлар шәхси хуҗалыкларында өч сыер асрыйлар. Сөтбикәләрдән тыш  үгезләр, бозаулар да тоталар. Терлекләрнең баш санын алар ике тапкыр арттырырга җыеналар. “Тана бозауларны үстереп сыер итәргә ниятлибез”,–ди хуҗабикә Наталья.

Федор Варламов кече ферма төзүгә субсидия алу өчен барлык кирәкле документларны туплаган. 200 мең сум күләмендәге дәүләт ярдәмен алар яңа сарай салуга тотарга ниятлиләр. Хуҗалык эшләрендә балалары Светлана белән Вячеслав та бик булыша.

Варламовлар мал-туарлары өчен кышка җитәрлек күләмдә печән хәзерләгәннәр инде.  Аны үзләренең МТЗ-82 тракторы белән ташыйлар. Әмма, терлекләренең баш санын арттырырга җыенганга, әле дә печән чабу, киптерү һәм ташу эшләрен дәвам итәләр. Быел бит печән мулдан – җый гына.

Авылдашлары Евгений Чернов һәм Нина Филиппова да Варламовлар үрнәгендә кече ферма төзергә планлаштыралар.