Әлки районы үзәгендә күп фатирлы йорт төзелә башлады

Соңгы елларда район үзәгендә күп фатирлы өйләр төзелми торган иде. Ә бит Базарлы Матакта торакка мохтаҗлык бар әле. Бигрәк тә яшь гаиләләр, бюджет оешмаларында хезмәт куючылар арасында үз “куышларын” булдырырга теләүчеләр күп.

Әнә шуны истә тотып, район җитәкчелеге арендага бирелә торган фатирлардан торган йорт җиткерергә карар кылган. Әлеге күп фатирлы йорт  Татарстан Президенты каршындагы торак фонды аша  төзелә. Базарлы Матакның бу өлешендә ял паркы, балалар бакчасы, сәүдә ноктасы кебек инфраструктура объектлары бар инде.