Әлки районы үзәгендә урам юллары яхшыра

Район үзәгенең Дзержинский урамы (ул 805 метр озынлыкта) бик чокыр-чакырлы хәлгә килгән иде. Район җитәкчелеге бу урам юлына ремонт ясауны быелгы программага кертте.

“Алексеевскдорстрой” егетләре 2-3 көн дигәндә бу урамга ике кат асфальт түшәп, ялт иткән юл ясап куйдылар.

Хәзер юл төзүчеләр Базарлы Матакның  Урман урамында эшлиләр. Биредә 400 метрга якын озынлыктагы юлга ике кат асфальт түшәләчәк, юл кырыйларына вак таш җәеләчәк.

Шулай ук район үзәге урамнарындагы асфальт юлларның чокырларын ремонтлый башладылар. 300 квадрат метрда шундый чокырлар тигезләнгән, тагын 535 квадрат метрны ремонтлыйсы бар әле.