Әлки районы:Авыр чир белән көрәшүче якташыбыз Айгөл Фазыйлова бүген иртән вафат булган

Бу хакта редакциягә Иске Камка авыл җирлеге башкарма комитеты секретаре Зәйтүнә Сәгыйрова хәбәр итте.

Казанда яшәүче якташыбыз Айгөл Фазыйлованың (аның мәрхүмә әнисе Иске Камка авылыннан) берничә ел яман шеш чире белән көрәшүе райондашларыбызга мәгълүм иде. 7 яшьлек улын ялгызы үстерүче 31 яшьлек Айгөлнең авыр язмышы турында федераль каналларның берсе берничә тапшыру да әзерләде. Райондашларыбыз арасында да Айгөлгә һәм аның улы Әмиргә ярдәм кулы сузучылар байтак булды. Игелекле кешеләр редакциягә китергән акчаларны без берничә тапкыр Иске Камка авыл җирлеге башлыгы Фәргать Әкбәров аша Айгөлгә тапшырдык. Айгөл һәр юлы редакциягә шылтыратып, үзенә булышкан кешеләргә ихлас рәхмәтләрен җиткерүебезне сорады.

Соңгы вакытта Айгөлнең хәле бик авырайган иде. Бүген иртәнге якта Казандагы хосписта аның йөрәге тибүдән туктаган. Изге җомга көнендә мәңгелеккә күчкән якташыбызның урыны оҗмахта булсын!

Әнисенең туган авылы Иске Камка халкы Айгөлне ярдәменнән ташламады, төрлечә булышып торды. Мәрхүмәне бүген шушы авыл зиратында гүргә иңдерәчәкләр. Авылның ир-атлары кабер казый башлаган. Айгөлнең җәсәден тиздән Казаннан алып кайтачаклар.

Айгөл Фазыйлованың беренче сыйныфта укучы улы Әмирне Айгөлнең мәрхүмә әнисенең Тукай районында яшәүче абыйсы Тәлгать тәрбиягә алачак.