Әлки районында Татарстан АССРның 100 еллыгына һәм драматург Кәрим Тинчуринның тууына 130 ел тулуга багышланган смотр-конкурс дәвам итә

Мәгълүм булганча, бу конкурс Татарстан АССР төзелүнең 100 еллыгына һәм күренекле татар драматургы Кәрим Тинчуринның тууына 130 ел тулуга багышлап үткәрелә. Һәр авыл җирлегенең үзешчән сәнгать коллективлары смотрга зур концерт һәм сәхнәләштерелгән театраль күренеш әзерли. Апак, Түбән Әлки, Югары Колчурино, Иске Чаллы җирлекләре үзешчәннәре конкурс программалары белән үз сәхнәләрендә һәм тирә-күрше авылларда чыгыш ясадылар инде. Туган якка, Татарстанга багышланган номерлар өстенлек иткән концертларны тамашачылар бик яратып кабул итә.