Әлки районында балалар өчен Каравон үткәрделәр

Рус милли костюмнары кигән өлкән төркем балалары халык җырларын һәм биюләрен башкардылар. Музыка җитәкчесе Анисия Кель сабыйларга бәйрәмнең ничек барлыкка килүен, аның традицияләрен үтемле итеп сөйләде. Аннан соң бәйгеләр һәм викториналар башланды. Малайларга һәм кызларга рус халкының көнкүреш әйберләре турындагы табышмаклар бигрәк тә ошады. Табышмакларны тәрбияче Людмила Мухина әзерләгән иде.

–Туган телләр һәм халыклар бердәмлеге елын бәйрәм итү җәһәтеннән балалар өчен 40 данә төрле милләт костюмнары сатып алдык. Аларны киеп чыгыш ясау балаларга бик ошый. Июньдә сабыйлар өчен чуаш бәйрәме Уяв һәм татар милли бәйрәме Сабан туе үткәрергә дә ниятлибез. Безнең төп бурычыбыз – балалар туган телләрендә аралашсын, районыбызда яшәүче халыкларның мәдәнияте нигезләрен, традицияләрен яхшы белсен,–ди балалар бакчасы җитәкчесе Гөлназ Латыйпова.