Әлки районында көнгә 3 мең тонна сенаж салалар

Соңгы вакытта аяз һава торышы урнашкач, хуҗалыкларда көнгә 3 мең тоннага чаклы сенаж сала башладылар.Барысы 18 мең тоннадан артык яшел масса базларга урнаштырылды. Бу узган елның шул чоры белән чагыштырганда ике тапкыр күбрәк дигән сүз.

Сенаж салуда  "Хузангай" җәмгыятендә бик актив эшлиләр. Биредә азык утары базларына 4 мең тоннадан артык яшел масса салырга өлгерделәр. Чуаш Кичүе, Карга сөтчелек комплекслары өчен 3,5 әр мең тонна сенаж хәзерләнгән.

Хуҗалыкларда кукуруз һәм көнбагышның рәт араларын эшкәртү дәвам итә. Шулай ук пар җирләрендә эшләр алып барыла. Көзге чәчү өчен 21,3 мең гектар пар җире хәзерләнергә тиеш булса, шуның яртысы эшкәртелгән инде.