Әлки районында оешмалар, авыл җирлекләре һәм аерым йортлар арасында иң матур Яңа ел чыршысына һәм кар-боз сыннарына бәйге игълан ителде

Район үзәгендә һәм авылларда берсеннән-берсе ямьлерәк итеп бизәлгән биналар, йортлар көннән-көн арта. Паркларда, оешмалар каршында кар-боздан ясалган Кыш бабай һәм Кар кызы, төрле җәнлекләр сыннары да пәйда була. Бу әкияти бер матурлык, бәйрәм рухы һәм күтәренкелек тудыра.

Иң матур бизәлгән оешмалар һәм йортлар Яңа ел төнендә Үзәк паркта үтәсе бәйрәмдә аталачак. Авыл җирлекләре арасында иң матур чыршыга бәйге нәтиҗәләре дә шунда чыгарылачак.