Әлки районында юллардагы чокырларны ямыйлар

Моңарчы алар юлларны тигезләү өчен салкын асфальт кулландылар һәм барлыгы 130 квадрат метр мәйданны ремонтлап-ямап куйдылар.

Ә 9 марттан юллардагы чокырларга кайнар асфальт түши башладылар. Өч көндә барлыгы 40 тонна асфальт салып, юлларны рәткә китерделәр эшчеләр.

Участок мастеры Рифат Зәйдуллин әйтүенчә, кайнар асфальт термоконтейнерда китерелә, аның температурасы 120-140 градуска җитә. “Мондый масса белән сак эш итәргә кирәк. Шуңа да эшчеләр инструктаж үттеләр, куркынычсызлык кагыйдәләре буенча имтихан тапшырдылар. Алар махсус киемнәр белән тәэмин ителгән”,–диде ул.