Әлки районының Базарлы Матак авылы Нәби Дәүли исемендәге гимназия укытучысы Алия Шәфиева күркәм юбилеен билгеләп үтә
Ямьле, моңлы Актаныш ягының Татар Суыксуы авылында көзнең аллы-гөлле төсләргә кергән бер мизгелендә – 1963 нче елның 25 сентябрендә Инсаф белән Гөлдария гаиләсендә беренче бала булып дөньяга аваз сала Алия. Аның бала чагы һәм мәктәп еллары үзләренең мең хуҗалыклы Суыксу авылында үтә. Башлангыч сыйныфларда укыганда ук укытучы булу теләге уяна аңарда. Бу хыялын тормышка ашыру өчен 8 нче сыйныфтан соң Минзәлә педучилищесына белем алырга чыгып китә. Училищены тәмамлагач, 1983 нче елда юллама белән Әлки районына килә, Яңа Чаллы авылында башлангыч сыйныфларны укыта башлый.
Шушы авылда үз тиңен таба Алия. Замир исемле күркәм егеткә кияүгә чыга. Зур өметләр, шатлык-куанычлар белән яшәп ятканда, кайгы җиле ишек кага. Алия Инсафовна ике баласы белән ялгыз кала. Аңа берсеннән- берсе кечкенә сабыйларын аякка бастыру өчен әти дә, әни дә булырга туры килә. Сынмый-сыгылмый, улына һәм кызына урта һәм югары белем бирә. Балалары тормышта үз юлларын табып, яраткан эшләрендә хезмәт куялар.
Искиткеч тырыш, таләпчән педагог Алия Шәфиева читтән торып югары белем ала. Ул үзенең бөтен осталыгын, тәҗрибәсен эшкә җигеп, һәр укучының күңеленә юл табып белем бирә. Дәрес материаллары белән генә чикләнми, кызыксындыру чараларын гел төрләндереп тора.
Мәгариф өлкәсендәге яңалыкларны үзләштереп, заманча технологияләрне укыту-тәрбия процессында киң кулланып эшли Алия Инсафовна. Ул районда иң беренчеләрдән булып “Латин графикасы нигезендә укырга, язарга өйрәтү” проектын, А.З.Рәхимов технологиясен кулланышка керткән, башлангыч сыйныфларда мобиль класс белэн эшләү ысулын өйрәткән укытучы. Югары квалификацияле бу педагог Татарстан Мәгариф һәм фән министрлыгы каршындагы аттестация комиссиясе әгъзасы да.
Алия Шәфиеваның эш тәҗрибәсе – коллегаларына үрнәк. 2011 елда ул “Безнең яңа укытучы” грантына ия булды, 2013 елда “Ел укытучысы” район конкурсында призер булып танылды. Эш тәҗрибәсе белән уртаклашып, фәнни-гамәли конференцияләрдә катнашып, хезмәтләрен педагогика җыентыкларында бастырды. «Мәгариф» җурналында, «Ачык дәрес» республика газетасында методик эшләре дөнья күрде.
Алия Инсафовнаның тырыш хезмәте укучыларының белем сыйфатында, елның елында республика олимпиадаларында, халыкара конкурсларда призлы урыннар алуларында чагылыш таба.
Төп хезмәте белән беррәттән, Алия Шәфиева җәмәгать эшләре дә алып бара. Ул күп еллар инде Базарлы Матакта участок сайлау комиссиясе рәисе вызыйфасын уңышлы башкара. Быел Татарстан Үзәк сайлау комиссиясе аны Рәхмәт хаты белән бүләкләде.
Коллегабызның 35 еллык педагогик хезмәте лаеклы бәяләнә. 2005 елда Алия Инсафовна «Казанның меңьеллыгы” медале белән бүләкләнде, 2006 елда аңа Татарстан Мәгариф һәм фән министрлыгының «Укытудагы казанышлары өчен» күкрәк билгесе тапшырылды.
Хөрмәтле хезмәттәшебез бу көннәрдә күркәм юбилеен билгеләп үтте. Аны ихлас күңелдән тәбрикләп, сәламәтлек, күңел күтәренкелеге, хезмәтендә яңадан-яңа иҗади уңышлар телибез.
Фәридә ЯРУЛЛИНА,
Нәби Дәүли исемендәге Базарлы Матак гимназиясе директоры.
Следите за самым важным и интересным в Telegram-каналеТатмедиа
Нет комментариев