Татарстан трассасында биш автомобиль бәрелешкән [+фото]

5 октябрьдә көндез Татарстанның Югары Ослан районында трассада биш автомобиль бәрелешкән дип хәбәр итә Татарстан Республикасы буенча Эчке эшләр министрлыгы матбугат хезмәте.

Трассаның 759 нчы чакрымында «Интернационал» йөк машинасының 52 яшьлек йөртүчесе ремонтка туктаган фураны алдан күрмәгән. Һәлакәт сигнализациясен һәм авария билгесен соң күреп алган һәм ашыгыч рәвештә тормозга баскан.

Аның артыннан килгән «Газель», «Шевроле Нива» һәм «Рено» йөк машинасы шулай ук туктарга өлгермәгән һәм бер-берсенә бәрелешкәннәр.

Һәлакәт урынына янгын сүндерүчеләр килгән, алар автомобильләрдә ут чыкмасын өчен аккумляторларын өзгән, дип хәбәр итә Россия Гадәттән тыш хәлләр министрлыгының Татарстан Республикасы буенча Баш идарәсе матбугат хезмәте.

Якынча мәгълүматлар буенча юл һәлакәтендә "Газель"нең 60 яшьлек пассажиры зыян күргән, ул Казанның 12 нче хастаханәсенә озатылган.