Татарстанда автобуска соңга калып, буранда адашкан ир-атны коткарганнар

Татарстанда автобуска соңга калган һәм буранда адашкан 77 яшьлек ир-атны коткарганнар. Бу хакта «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсе матбугат хезмәтеннән хәбәр иттеләр.

«Кичә 21.55 сәгатьтә 112 бердәм номерына Питрәч районының «Мишә-2» бакчачылык җәмгыяте янында 77 яшьлек ир-атның буранда адашуы хакында хәбәр килгән», - дип искәрттеләр ведомствоның матбугат хезмәтендә.

Чакыру буенча килгән 2нче зона янгын-коткару отряды хезмәткәрләре ачыклаганча, пенсионер автобуска соңга калган, көчле буран аркасында ориентациясен югалткан һәм үзенең кайда икәнлеген аңламаган.

Өлкән яшьтәге ир-атны яшәү урыны буенча Казанга илтеп куйганнар. Аңа медицина ярдәме кирәк булмаган.
 

Бу хакта тулырак: https://tatar-inform.tatar/news/2019/03/26/183308/