Әлки районы: Гаилә, мәхәббәт һәм тугрылык көнендә 60 ел бергә яшәгән Раиса һәм Николай Романовларны "Мәхәббәт һәм тугрылык өчен" медале белән бүләкләделәр

ФОТОРЕПОРТАЖ

Бәйрәмне район башлыгы Александр Никошин котлау сүзләре белән башлап җибәрде һәм болай диде:
–    Бүген бирегә күпләргә үрнәк, тәр-типле гаиләләрне чакырдык. Бер- берсен озак еллар хөрмәт итешеп, тугрылык саклап яшәгән бу гаиләләрдә балалар да акыллы, эш сөючән булып үсә. Менә бүген бала тудыру бүлегендә Фурасевлар гаиләсен өйләренә озаттылар. Беләсезме, әниләре җиденче баласын тапкан бит! Ничек шәп! Яшьләргә әнә шундыйлардан үрнәк алырга кирәк.Тормыш шартлары авыл җирендә дә яхшыра, балалар үстерү өчен мөмкинлекләр җитәрлек. Ел саен без районда фельдшер-акушерлык пунктлары, клублар, спорт мәйданчыклары төзибез. Яңа программа буенча күбрәк торак төзергә керешәчәкбез. Яшь гаиләләр бу мөмкинлекләрдән киңрәк файдаланып, күп итеп балалар үстерсеннәр иде.
Ел саен Россиядә Гаилә, мәхәббәт һәм тугрылык көнендә районның бер гаиләсен “Мәхәббәт һәм тугрылык өчен” медале белән бүләклиләр. Быел бу бүләккә Юхмачыдан Раиса Тимофеевна белән Николай Владимирович Романовлар лаек булды.Менә алтмыш ел инде алар уртак тормыш сукмагыннан кулга-кул тотышып атлыйлар. Икесе дә гомер буе намус белән эшләгән, туган ягыбыз үсешенә үз өлешләрен керткән, шуның өстенә ике бала үстереп, авырлыкларны да, сөенечен дә уртак итеп яшәгән. Бу сабыр, зыялы һәм бик матур парга сокланып туймассың! Александр Никошин үзләренә “Мәхәббәт һәм тугрылык өчен” медален тапшырганда да дулкынлануларын башкалардан яшерергә тырышып тыйнак кына елмайды алар.
Бәйрәмгә килүчеләрне татар телендә район башкарма комитеты җитәкчесе Илнур Юсупов котлады.
–    Гаиләләр нык булганда дәүләтебез дә нык. Кызганыч, Россиядә соңгы вакытта халык саны кимүгә бара. Ә бит балалар табып үстерүчеләргә күп кенә ярдәм чаралары бар – пособиеләр түләнә, әни капиталы, җир кишәрлеге бирелә. Яшьләр, куркып тормагыз, үз гаиләләрегезне корыгыз, алар нык булсын. Күзгә-күз карашып кына, кулга-кул тотышып кына яшәп, күп итеп балалар үстерегез,– диде ул.
Моның өстенә Илнур Вәлиевич “Теремкәй” балалар бакчасы коллективына шушы паркны карап торган өчен Рәхмәт хаты тапшырды. Ул Базарлы Матактан быел алтын туйларын билгеләп үткән Флүсә һәм Шәрифулла Мөхәммәтҗановлар, Чуаш Кичүеннән бергә егерме биш ел яшәгән Лилия белән Риназ Шәйхетдиновлар гаиләләрен Рәхмәт хатлары һәм бүләкләр белән сөендерде. Ә ЗАГС бүлеге җитәкчесе Энҗе Хәлиуллина икенче баласын – кызы Камиләне тапкан Гөлүсә Зәйдуллинаны бүләкләде (әтиләре килә алмаган, эштә икән).
Шуннан соң бәйрәм-не район үзешчәннәре концерты дәвам итте. Җылы кояш, паркның саф һавасы бәйрәмгә килүчеләрнең кәефен күтәрүгә үз өлешен кертте, билгеле. Ә бала-чага шундагы уен комплексында чыр-чу килеп рәхәтләнде.