Әлки муниципаль районы тарихы

Әлки муниципаль районы Татарстанның көньягында урнашкан, ул Ульяновск, Спас, Алексеевск, Нурлат районнары белән чиктәш.  
Әлки районы административ- территориаль үзәк буларак 1930 елның 10 августында төзелә. Башта ул Әлки дип атала, чөнки район үзәге Түбән Әлки авылында урнашкан була. Моңа кадәр ул Казан губернасының Спас уездына – Спас кантонына керә. 1937 елда район үзәге Базарлы Матакка күчерелә. Административ учреждениеләр өчен өстәмә биналар кирәк булганга шундый карар кабул ителә. Базарлы Матакта мондый биналар күбрәк була. Нигездә, алар сәүдәгәрләрдән тартып алынган йортлар була.

Районның көньяк-көнбатыш өлеше 1944-1960 елларда – Кузнечиха районына, ә көньягы Юхмачы (1935-1960 еллар) районына керә. Административ үзәкләрне зурайтканда, 1963 елның 1 февраленнән район Куйбышев районына керә. Ә 1965 елның 12 гыйнварыннан кире элеккеге чикләре булдырыла. Район үзәге – Базарлы Матак, Бряндино тимерьюл станциясеннән 72 чакрым ераклыкта Актай елгасы буенда урнашкан.