Әлки районы Әхмәт авылында бу атнада балалар бакчасында капиталь ремонт башлана

Бу балалар бакчасын төзекләндерү быел республика программасына кертелде. Әхмәтлеләр өчен ул күптән көтелгән вакыйга. Авылда балалар бакчасы узган гасырның 70 нче еллар башында, ул вакыттагы “Энергетик” совхозы көче белән төзелгән булган. 50 елга якын хезмәт иткән, йөзләгән балага мәктәпкәчә белем һәм тәрбия биргән әлеге бакча бер тапкыр да капиталь ремонт күрмәгән.

Бу атнада төзүчеләр ремонт эшләренә керешәчәк. Моңа кадәр авыл халкы өмәләр оештырып (йогышлы чирдән саклану чараларын күреп, чиратлап) бакчадагы барлык җиһазларны янәшәдәге мәктәп бинасына күчергәннәр.