Әлки районында өйгә эшләрне күп бирмәскә киңәш ителә

Авылларда интернет тизлеге проблемасы да күбесенчә хәл ителгән. Бу хакта безгә район мәгариф идарәсе җитәкчесе урынбасары Сурия Вәлиева хәбәр итте.

“Укучылар да, укытучылар да ике атна инде өйдән торып эшли. Килеп туган мәсьәләләрне шунда ук хәл итәргә тырышабыз. Балаларга  артыгын йөкләмәс өчен укытучыларга өйгә эшләрне бик күп бирмәскә киңәш итәбез”,–ди Сурия Вәлиева.

Дәүләт имтиханнары тапшырасы 9 нчы, 11 нче сыйныфларда төп игътибарны сынау бирәсе фәннәргә юнәлтәләр. Андый тәкъдимнәр яңгыраса да, уку елын кыскарту турында сүз бармый. Укулар май ахырына кадәр дәвам итәчәк.

Ә менә дүртенче чиректә барлык сыйныфларда да буласы Бөтенроссия тикшерү эшләре  көзгә күчерелгән.