Рөстәм Миңнеханов "Ярдәм янәшә! Помощь рядом!” хәрәкәтенең кирәклеген һәм үзвакытында булуын әйтте

Татарстан Президенты Рөстәм Миңнеханов пандемия һәм үзизоляция чорында халыкка социаль ярдәм күрсәтүче активистлар белән очрашты. Ул "Ярдәм янәшә! Помощь рядом!” республика хәрәкәтен оештыру башлангычын хуплады. Бу хакта Татарстан Президенты матбугат хезмәте хәбәр итә.

Президент "Ярдәм янәшә! Помощь рядом!” хәрәкәтендә катнашучыларның инициативасын югары бәяләде, бу эшнең бик вакытлы һәм кирәкле булуына басым ясады. Бүгенге вәзгыятьтә өлкән яшьтәге гражданнар турында гына кайгыртып калмыйча, республиканың мохтаҗ һәр кешесенә ярдәм итәргә кирәк, ди Президент.

«Ярдәм янәшә! Помощь рядом!» хәрәкәтенә эшчәнлекләре халыкка ярдәм итүгә юнәлдерелгән төрле оешмалар кушылды. Алар - республиканың 60 меңнән артык волонтеры, хәйриячеләр, коммерциячел булмаган оешмалар, зур предприятиеләр, кече бизнес вәкилләре һәм йөзләгән битараф булмаган гражданнар.