Әлки районында “Куркынычсыз тәгәрмәч-2025” район бәйгесе узды

Анда 18 команда составында 9-11 яшьләрдәге 72 мәктәп укучысы катнашты. 

Малай-кызлар юл хәрәкәте кагыйдәләрен белү, беренче медицина ярдәме күрсәтү, велосипед белән куркынычсыз йөрү, иҗади бәйгедә көч сынашты. Сынаулар 5 этапта үтте: “Юл хәрәкәте кагыйдәләрен белүчеләр,  “Беренче медицина ярдәме күрсәтү нигезләрен белү”, “Велосипедны фигуралы йөртү”, “Автошәһәрчек”, “Тормыш куркынычсызлыгы нигезләре” һәм иҗади бәйге –  “Без барыбыз да юл хәрәкәтенең куркынычсыз булуын телибез”. 

Бәйге комиссиясе карары нигезендә гомуми зачетта түбәндәге командалар җиңү яулады: 1 нче урын – Түбән Әлки мәктәбе, 2 нче урын – Юхмачы мәктәбе, 3 нче урын – Татар Борнае мәктәбе. 

Бар җиңүчеләргә һәм бәйгедә катнашучыларга дипломнар, “Юл хәрәкәте куркынычсызлыгы” бюджет оешмасыннан бүләкләр тапшырылды.