Әлки районында халык бәрәңге ала

"Тяминов" фермер хуҗалыгы быел алты сорт бәрәңге үстергән. Фермер Юрий Тяминов әйтүенчә, кайбер сортларның уңышы бик яхшы, ә кайсы начар уңган. Югыйсә җире дә, яңгыры да, коры айларда сугаруы да бер үк булган.

Халыкның бәрәңге бакчаларында да уңыш төрлечә. Моның сәбәбе турында белешеп без "Россельхозцентр"ның Әлки филиалы җитәкчесе Рафик Сафинга мөрәҗәгать иттек. Аның әйтүенчә, бәрәңге орлыгын дөрес сайлауның әһәмияте бик зур. Орлыкка дигән бәрәңге тиешле тикшерү үткән, сәламәт, чирләргә бирешмәүчән булырга тиеш. Икенче икмәк үстерелә торган җирне дә алыштырып тору зарур. Горчица кебек үлән үстерү дә бәрәңге игеләсе участокны дәвалый. Бәрәңге ашланган, ачы булмаган туфракта әйбәт уңа, ди белгеч.