Әлки районында бүген Мәңгелек ут янында “Беркем дә, берни дә онытылмады” дигән митингта Билгесез солдатны искә алдылар

Бу истәлекле датаның төп максаты – сугышчан хәрәкәтләрдә һәлак булган һәм исемнәре билгесез калган совет, Россия сугышчыларының үлемсез батырлыгын һәм алар турындагы хәтерне мәңгеләштерү. Мәңгелек ут янында узган митингка сугыш һәм хезмәт ветераннары, авыл халкы, мәктәп укучылары җыелды. Халык алдында чыгыш ясап, район башлыгы Александр Никошин яу кырында башларын салган, хәбәрсез югалган дип саналган  сугышчы якташларыбызның исемнәрен ачыклау юнәлешендә район мәктәпләрендә җитди эшләр алып барылуын әйтте, бу мөһим һәм катлаулы хезмәт белән шөгыльләнүчеләргә рәхмәт белдерде.

Митингта район хәрби комиссары Виктор Лаврентьев, Бөек Ватан сугышы ветераны Лев Миндрюков, район ветераннар советы рәисе Ришат Хәлиуллин чыгыш ясадылар. Базарлы Матак мәктәбе укучылары күрсәткән тирән эчтәлекле монтаж да дулкынландыргыч булды. Бер минут тынлык белән яу кырында һәлак булган солдатларны искә алдык. Аннан Азат итүче солдат һәйкәле итәгенә тере чәчәкләр салынды.