Әлки районында Яңа ел төне имин үтте, хәвеф-хәтәрләр булмады

Шунысы сөенечле, Яңа 2019 елны каршылаган бәйрәм төне районда тыныч-имин үтте.

Без районның төрле хезмәтләре белән элемтәгә кердек. Полициядә, янгын сүндерү частенда, газ хезмәтендә һәм электр челтәрләрендә Яңа ел төнендә бер нинди гадәттән тыш хәлләр, хәвеф-хәтәр булмавын хәбәр иттеләр.

Халык Яңа елны нигездә сау-саләмәт каршы алган, дияргә дә була. Район үзәк хастаханәсенең “Ашыгыч ярдәм” фельдшеры  Анатолий Васильев әйтүенчә, бәйрәм төнендә медикларны бары бер тапкыр өйгә чакыртканнар. Ул да булса – кан басымы күтәрелү сәбәпле. Ә иртән берәү температурасы күтәрелеп мөрәҗәгать иткән.  Ә гомумән алганда барасы да тыныч, имин, диде безгә “Ашыгыч ярдәм” фельдшеры.