Бер коллективта эшләгән хезмәттәшләр 35 елдан соң янә очраштылар

Менә шул теләк матур бер кичәне барлыкка китерә. Очрашуны оештыручыларның берсе Көлемсәр Гатина бүген дә әле алган хис-кичерешләре эчендә кайный.

Әйе, тырыша торгач, моннан 25-35 ел элек бер коллективта  эшләгән хезмәттәшләр, нәкъ менә “Актай” кафесында, алар вакытында “Столовая”, “Кулинария” дип аталган таныш эш урынына җыела. 20 ел күрешмәгән коллегаларның сөйләшер сүзләре дә күбәйгән булган шул. 

–     Якын туганнардай рәхәтләнеп аралаштык, хәл белештек. Бер күрешү – үзе бер гомер, дип белми әйтми икән халык. Кафеның бүгенге җитәкче-мөдире Лилия Шамил кызына рәхмәтләребез бик зур. Безне иң тәмле ризыклар белән сыйладылар, барлык уңайлыкларны тудырдылар. Эшләгән чорда без яшьләрне үз иткән, тормышка, эшкә өйрәткән өлкәнрәк абый-апаларыбызның да күңеле булды,–ди  Көлемсәр Габделхәй кызы, үзе дә йөрәк хисләрен тыя алмыйча дулкынланып.   

Аның сүзләренә караганда, очрашу бик матур, гомергә истә калырлык мизгелләр бүләк иткән. Хезмәттәшләре Ислам Габидуллин да:

“Моның кадәресен үк көтмәгән идем, искиткеч булды бит әле бу, – дип шатланган. 

–     Хөрмәтле өлкәннәребезнең сөенүен күрү генә дә ни тора бит! Димәк, ялгышмаганбыз, бу күрешү бик кирәк булган безгә,– ди Көлемсәр апа. Ә үзе һаман килгән хезмәттәшләренә дә, аларны кунак иткән кафе кызларына да кат-кат рәхмәтләрен укый. Өлфәт Хафизов кул астында эшләүләрен, аның гадел, туры сүзле, кешелекле җитәкче булуын да сөйләп алды ул. 

Кирәк шул мондый очрашулар: кемнедер искә алу өчен дә, өлкәннәрне хөрмәт итү өчен дә, үткәнеңә нәтиҗә ясау һәм, әлбәттә, киләчәккә ышанычлырак атлау өчен дә.