Әлки районы балалар иҗат йорты педагоглары үзизоляция вакытында битлекләр тегәләр

Мәгълүм ки, бүген битлекләр – иң күп сорала торган товарларның берсе. Даруханәләрдә инде алар күптәннән юк. Дистанцион эшләүгә күчкәч, өстәмә белем педагоглары Роза Арсланова һәм Надежда Мавзютова шушы бик кирәкле эшкә алынганнар. Алар көненә 100 әр битлек тегәләр. Район хакимияте заказы буенча өлкәннәр, күп балалы, аз керемле гаиләләр өчен 300 битлек теккәннәр. Хакимият аларны бушлай тараткан. Үз хезмәткәрләре өчен кибетләр, шулай ук аерым кешеләр дә заказлар бирә икән. Гомумән, сораучылар күп. Роза һәм Надежда битлекләрне төрле төстәге киҗе-мамык һәм трикотаж тукмадан тегә. Битлеккә аптырап йөрүчеләр булса, аларга мөрәҗәгать итә ала.