Әлки районында электр-көтүчеләр арта

Маллар саны аз булгач, чиратлап көтү дә тиз әйләнеп килә. Шул көтү проблемасыннан туеп, сыерларын бетерүчеләр дә аз булмады.

Соңгы елларда авылларда  электр-көтүче сатып ала башладылар. Бик уңай, диләр – чыбыкны бер сузып куясың да, көне буе малларыңны шушы “көтүче” карамагында калдырырга була. Сулы урын булса тагын да җайлы. Чыбыктагы көчле булмаган ток сыер борынын төртүгә чеметтерә башлый.

Авылларда электр-көтүчене халык бергә акча кушылып сатып ала.

Татар Төгәлбәендә дә быел сыерларны электр-көтүче көтә башлаган. Күп терлек асраучы Илнур Гәрәев аны “бик җайлы ысул” дип мактый. Беренче көнне генә көтүгә күз-колак булганнар. Аннан сыерлар электр үткән чыбыкка якын да килмәгәннәр.