Мәсхүт Шәйдуллин Әлки районы үсешенә сизелерлек өлеш керткән

Мәсхүт Ибраһим улы 1939 елда туган. 15 яшендә үк ул “Марс” колхозы әгъзасы була. Совет Армиясендә хезмәт иткәннән соң, туган ягына әйләнеп кайтып, Базарлы Матакның көнкүреш хезмәтләре комбинатында эшли башлый. 1973 елда аны “Татколхозстрой” идарәсенең төзелеш-монтаж җитәкчесе итеп билгелиләр. Ул Казан авыл хуҗалыгы институтында читтән торып укып, “Галим агроном” белгечлеген ала. 1983-1987 елларда Мәсхүт Ибраһим улы “Югары Актай” колхозы рәисе вазыйфасында эшли, 1987-1999 елларда Әлкинең хуҗалыкара төзелеш оешмасы белән җитәкчелек итә. 

70-80 нче елларда  хуҗалыкара төзелеш оешмасы авыр вакытлар кичерә, анда төзелеш материаллары һәм техника җитешми. Оешма җитәкчелеге Себердәге хезмәттәшләре белән элемтәләргә чыгып, аларны республикадан читтән эзләргә мәҗбүр була. Тимер юл аша йөкне Сургуттан Ульяновск өлкәсенең Бряндино станциясенә  кайтаралар, аннан исә нарат такталарны үз көчең белән Базарлы Матакка, хуҗалыкара төзелеш оешмасына ташырга кирәк була.  Хуҗалык үзхисаплыга әйләнә, техника – “КамАЗ”лар, трактор, краннар, төягечләр сатып алына... Ул вакытта Әлки районы КПСС райкомының беренче секретаре Дамир Каюм улы Каюмов була.
Әлки хуҗалыкара төзелеш оешмасы үсә, ныгый бара. Аның бригадалары уннарча колхоз һәм совхозларда, авылларда терлекчелек фермалары, азык цехлары, терлек йортлары, административ биналар төзи. 

1990 елда Мәсхүт Шәйдуллинга “Татарстан АССРның атказанган төзүчесе” исеме бирелә.
1980-1990 елларда район белән КПСС райкомының  беренче секретаре Нәҗип Бакиров җитәкчелек итә. Ул чорда район хуҗалыкара төзелеш оешмасы үзгәрешләр кичерә. Аның җитештерү күрәткечләре үсә (шул исәптән терлекчелек һәм үсемлекчелек продуктлары буенча да), таләпчәнлек арта, дисциплина булдырыла. 

Ул вакытка Мәсхүт Ибраһим улы эре төзелеш оешмасының көчле, тәҗрибәле җитәкчесенә әйләнә. Район җитәкчелеге аны хөрмәт итә, башкаларга үрнәк итеп куя. 

Агроном һөнәренә югары белем турындагы дипломы булганлыктан, Мәсхүт Шәйдуллин үзен әлеге эштә дә сынап карарга тели. Аны “Югары Актай” колхозы рәисе вазыйфасына күчерәләр. Өч ел эчендә хуҗалык бик нык үзгәрә. Ит, сөт, бөртек җитештерүчәнлеге арта, җитештерү биналары, йортлар салына. Ул колхозчыларны бушлай терлек азыгы, продуктлар белән тәэмин итә. Аларда тормышның яхшыруына өмет туа. 

Ә хуҗалыкара төзелеш оешмасында исә хәлләр киресенчә начарая. Мәхсүт Ибраһим улын элеккеге вазыйфасына алынуын сорыйлар. Шуннан соң аның җитәкчелегендә үзәк район хастаханәсе бинасы, җитештерү объектлары салына. 

Бераздан Мәсхүт Шәйдуллинга “Россия Федерациясенең атказанган төзүчесе” дигән мактаулы исем бирелә. Аны республиканың төзелеш министры Айзатуллов та хөрмәт итеп, башка җитәкчеләргә үрнәк итеп куя. Мәсхүт Ибраһим улы алдынгы җитәкчеләр белән, шул исәптән министр урынбасары Кварталлов белән дә тыгыз элемтәдә була. Ә ул районга тиешледән дә артыграк төзелеш материаллары бүлә. Районга еш килә, аның хәтта: “Төзелеш баруын күрү күңелле”, - дип кабатлаган сүзләре дә хәтердә. 
Мәсхүт Ибраһим улы күрше районнарның хуҗалыкара төзелеш оешмалары җитәкчеләре белән ярышырга ярата иде. Ул вакыт белән исәпләшмичә, үзен кызганмыйча эшләде. Авырганда, терелүгә үк, эшкә чыгарга теләве турында сөйләде. Хәле яхшыргач, бүлмәсенә ашыкты. Район үзәгендә аның җитәкчелегендә бар коммуналь шартлар булдырылып, тулы урамнар салында. 

Мәсхүт Шәйдуллин бакыйлыкка күчкәч, район үзәгендәге Яңа урамына аның исеме бирелде. Хәзер ул хезмәттәшләре, үз командасы белән бергә күршеләр булып яшәгән урам аның исемен йөртә. 

Мәсхүт Ибраһим улы яхшы ир һәм әти иде. Хатыны Наилә белән алар өч бала үстерделәр. Аның зур кызы Илкәй бүгенге көндә Социаль иминиятләштерү фондында эшли. Уртанчы улы Илсур, кызганыч, бүгенге көндә мәрхүм инде. Ул хуҗалыкара төзелеш оешмасында “КамАЗ” йөртүчесе булып эшләде. Кечкенә уллары Илнар Казан медицина университетының стоматология факультетын тәмамлап, табиб вазыйфасын сайлады. Кандидатлык диссертациясен яклады, табиб булып эшли һәм университетта белем бирә. 
Мәсхүт Шәйдуллин турында якты истәлекләр исә бүгенге көндә дә саклана.