Әлки мелиораторлары Агросәнәгать паркында ярминкә үткәрде

Бу көнне “Татмелиорация” системасына кергән предприятиеләр шәһәр халкына үзләре җитештергән һәм бартер ысулы белән алынган продукцияне тәкъдим итте. Биредә бәрәңге, кабак, ташкабак, кишер, суган кебек яшелчәләргә, сөт ризыкларына, иткә, балыкка сорау зур булды.

Мелиораторлар ярминкә кунакларын кайнар чәй, коймак белән дә сыйладылар. Районыбыз сәнгать осталары исә иртәнге сәгать алтыдан көн уртасына кадәр дәртле җыр-биюләре белән халыкның күңелен күрделәр.

Ярминкәнең барышын Татарстан хөкүмәте җитәкчесе Алексей Песошин карап йөрде. Ул мелиораторларның көзге сәүдәгә зур әзерлек белән килүләрен, халыкка чын-чынлап бәйрәм оештыруларын югары бәяләде.