Әлки хәбәрләре

Әлки районы

18+
Рус Тат
2024 - Гаилә елы
Яңалыклар

Әлки районында Бөтенреспублика “Уяв” чуаш милли бәйрәменә әзерлек эшләре бара

10 июльдә безнең районда узачак Бөтенреспублика “Уяв” чуаш милли бәйрәменә әзерлек эшләре актив алып барыла. Ул эшләр белән махсус төзелгән республика һәм район комиссияләре җитәкчелек итә.

Шушы көннәрдә район комиссиясенең киңәйтелгән утырышы үткәрелде, аның эше белән район башлыгы Александр Никошин җитәкчелек итте. 
“Уяв” киң колачлы булып узачак, аңа 6 мең чамасы кунак көтелә. Мәскәү, Россиянең берничә өлкәсе һәм үзебезнең республика җитәкчеләре әлеге бәйрәмдә катнашырга теләк белдергәннәр. “Уяв”ка шулай ук күпсанлы иҗат коллективлары да киләчәк икән.
Александр Никошин мондый киң масштаблы чараның безнең районда беренче тапкыр узуын билгеләп үтте. Шунлыктан чуаш халык бәйрәменә бик җентекләп әзерләнергә кирәклеген ассызыклады ул.
Комиссия утырышында кунакларны каршы алу, ашату, бәйрәм узасы мәйданны тиешенчә әзерләү кебек мәсьәләләр каралды. Районга әлеге бәйрәмне әзерләүдә республика тарафыннан финанс ярдәме күрсәтелә. Шул ук вакытта төп чыгымнарны үзебездәге “Хузангай” җәмгыяте, Мари Эльдагы “Звениговский” предприятиесе үз өсләренә алуны әйтеп үтик. 
Бәйрәм мәйданында нарат буралардан өйләр күтәрелде. Әлеге өйләр үзенчәлекле музейга әйләндерелә, аларда биредә яшәүче халыкларның йолалары, кәсепләре күрсәтеләчәк. Бәйрәмгә килүчеләргә хезмәт күрсәтү өчен ике катлы кафе, кунак йорты да төзелеп килә. 
Янәшәдә генә күл казылган, аның тирә-ягы бик матур. Күлдә хәтта аккошлар йөзеп йөри. Шунда ук ял паркы булдырылган. Арырак исә зур кирмән төзелә. 
Бәйрәм узасы мәйданга зур сәхнә кайтарып урнаштырылган. Биредә тагын берничә кечерәк сәхнә булачак. Чөнки халык бәйрәмендә җәмгысе 900 артистны берләштергән иҗат коллективлары чыгыш ясар дип көтелә.
“Уяв” бәйрәме узгач, бу корылмалар туристларны җәлеп итү өчен файдаланылачак.

Следите за самым важным и интересным в Telegram-каналеТатмедиа


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев