Азат Низамиев автор яңалыклары

Шушы арада “Алинә” универсаль спорт залында Бөек Җиңүнең 74 еллыгына багышлап киокусинкай каратэ буенча төбәкара турнир үткәрелде. Әлеге зур бәйгедә Татарстаннан, Ульяновск, Удмуртия, Мари иле, Оренбург өлкәләреннән 270 спортчы көч сынашты.

Кичә, 16 майда, Базарлы Матактагы “Йолдызлык” кафесында район башлыгы Александр Никошин исеменнән ифтар ашы үткәрелде. Анда районның барлык авылларыннан муллалар, мәчет картлары чакырылды. Кунаклар арасында хатын-кызлар да бар иде. Өлкәннәрне мәҗлескә авыл җирлекләре башлыклары алып килде.

Республика башкаласы Казанда Россиянең төрле төбәкләреннән килгән Кеше хокуклары буенча вәкаләтле вәкилләрнең Координация советы утырышы булды. Анда төп тема – кешеләрнең хезмәт хокуклары турында сүз барды. Бер төркем омбудсменнар безнең районда да булып китте.

Районда иртә культуралар чәчү тулысынча төгәлләнде. Игенчеләребез 6800 гектарда арпа, 5500 гектарда бөртек өчен кукуруз, 2600 гектарда рапс, 891 гектарда солы чәчтеләр.

Берничә ел элек Базарлы Матак урта мәктәбендә укып йөргән Илнар Гирфанов “Россия лидерлары” бәйгесендә җиңү яулады, ә бүген Мәскәүдә “Бердәм Россия” Бөтенроссия партиясе үзәк комитетында эшли. Узган шимбәдә ул районыбызда булды һәм үзе белем алган мәктәптә укучылар белән очрашты. Мондый шәхес белән якыннан аралашу, әлбәттә, кызыклы да, тәэсирле дә, файдалы да булды.

Дамир Шәйхетдинов заманында авыл халкы өчен бик тә кирәк булган эшкә алынган иде. Ул халыктан җыелган сөтне беренчел эшкәртеп, заводларга озата башлады.

Соңгы елларда районда өстәл теннисы белән шөгыльләнүче яшьләребез күбәйде. Һәр мәктәптә, кайбер авыл клубларында теннис өстәлләре урнаштырылу да моңа этәргеч биргәндер. Узган шимбәдә “Алинә” универсаль спорт залында өстәл теннисы буенча район беренчелеге ярышлары көне буе барды.

Автомобиль йөртү таныклыгы алу өчен имтихан биргәндә юл хәрәкәте кагыйдәләре буенча билетларга 20 минут эчендә җавап бирү таләп ителә. Район ДОСААФ оешмасы үткәргән “Яшь йөртүче-2019” бәйгесендә катнашкан кызларга исә 20 сораудан торган билетларга җавап бирү өчен 21 секунд вакыт җитте.

“Актай елгасында су күтәрелеп, Базарлы Матактагы җиде йортны су баскан. Аларда яшәүче 17 кешегә ярдәм күрсәтергә кирәк..” Әнә шундый сигнал буенча 17 апрельдә районда команда-штаб өйрәнүләре үтте.

Районыбызның иң уңышлы эшкуарларының берсе Дамир Шәйхетдиновны Татарстанда гына түгел, Россия төбәкләрендә дә яхшы беләләр. Хәзер инде ул якын чит илләр белән дә эш итә башлады. Дамир Шәйхетдинов, 100 кешене берләштергән коллектив булдырып, транспорт хезмәтләре күрсәтә, дистәгә якын районнан сөт җыеп, аны беренчел эшкәртүне оештырды, үсемлек мае җитештерү, төзелеш материаллары эшләп чыгару белән дә җитди шөгыльләнә. Эшмәкәрнең хәйриячелек гамәлләре дә райондашларыбызга яхшы мәгълүм. Ул мәчетләргә, мәктәпләргә һәм балалар бакчаларына, авылларның көнкүреш проблемаларын хәл итүгә, тормышта авыр хәлдә калучыларга ярдәм итеп тора. Былтыр бертуган Шәйхетдиновларның (Дамир һәм Альберт) Түбән Әлкидәге җитештерү базасы Бөтенроссия татар авыллары эшмәкәрләре җыенының тәҗрибә уртаклашу мәйданы итеп алынды. Дамир Шәйхетдинов предприятиесендә булганда Президент Рөстәм Миңнеханов: “Авылларны бүген шундый егетләр эшләтә һәм яшәтә”,–дигән иде. “Татарстанның атказанган авыл хуҗалыгы хезмәткәре” дигән мактаулы исем таныклыгын да әлеге җыенда Дамир Шәйхетдиновка Президент үзе тапшырды.

Район басуларына биш самолет белән һәм дистәдән артык үзйөрешле агрегатлар ярдәмендә минераль ашламалар кертелә. Бер үк вакытта күпьеллык үләннәрне һәм туңга сөрелгән җирләрне тырмалау эшләре бик актив башланып китте.

Бу атнада игенчеләребез язгы кыр эшләренә керешәчәк. “Кызыл Шәрык-Агро”, “Хузангай” җәмгыятьләре уҗымнарны тукландыра башлыйлар. Быел районда 42 мең гектарга якын мәйданда сабан культуралары чәчү планлаштырыла.

Яңа салым режимы: кызыктырырлык яклары күп Ел башыннан илебезнең дүрт төбәгендә, шул исәптән Татарстанда да үзмәшгульлек буенча “һөнәри керемгә салым” режимы эшли башлады. Ул пилот проекты, ягъни эксперимент буларак гамәлгә кертелде. Үзмәшгульлеккә күчү ирекле төстә башкарыла. Районда 42 кеше шушы яңа салым системасында теркәлгән.

6 апрельдә “Алинә” универсаль спорт залында күп еллар район Сабантуйлары батыры булган Талибулла Яруллин истәлегенә милли көрәш буенча районара турнир була.

Киокусинкай буенча14-15 яшьлек үсмерләр арасында Идел буе Федераль округы беренчелегендә әлкилеләр уңышлы чыгыш ясады.