Әлки районы хезмәт коллективлары терлекләр өчен яфрак азык хәзерләүдә булышалар. ФОТО

 Витаминнарга бай бу терлек азыгы кышкы чорда зур кыйммәткә ия. Хәзер аны хәзерләү өчен иң кулай  

Яфрак азыкны чыбыкның калынлыгы 1-1,5 сантиметрдан ар­тканчы бәйлиләр. Агач чыбыгы күпме нәзек булса, ул шулкадәр витаминлы, маллар өчен файдалы. Яфрак азыкны каен, өрәңге, чикләвек, юкә, миләш кебек агачлардан себе­рке рәвешендә бәйләп хәзерлиләр. Тик бездә үскән кайбер агачлар яфрак себеркесе өчен яраклы түгел. Әйтик, шомырт терлек азыгы өчен ярамый – анда си­ниль кислотасы күп.

Һәр елны июль аен­да районда маллар өчен, бигрәк тә бо­зауларга яфрак азык хәзерләнә. Бу эштә рай­он үзәгендәге оешма- учреждениеләр коллек­тивлары, авыллардагы бюджет хезмәткәрләре катнаша.

Яфрак азык хәзерләү өчен районда урманнар җитәрлек. Дөрес, эшкә керешер алдыннан ур­манчылар белән аның урынын билгеләү зарур. Нәкъ менә июль аен­да агач яфракларында маллар өчен витамин запасы югары була.

Авыл хуҗалыгы һәм азык-төлек идарәсе белгечләре исәпләвенчә, бездәге яшь малларга кышла­туга кимендә 50мең пар яфрак хәзерләү за­рур. Шулай ук 3770 пар бәйләм дару үләннәре белән запаслану мәслихәт.

Райондагы һәр хезмәт коллективы­на, анда эшләүчеләр санын исәпкә алып, яфрак азык хәзерләү биреме җиткерелгән иде. Бу эштә Базарлы Матак урта мәктәбе (директоры Луиза Абдрахманова), фи­нанс-бюджет палатасы (җитәкчесе Илгиз Габи­дуллин), ТР Казначы­лык департаментының район бүлеге (Миләүшә Җәләлова), кино учре­ждениесе (Фәргать Гай­син), яшьләр эшләре һәм спорт бүлеге (Айрат Җиһангиров), “Әлки хәбәрләре” газетасы ре­дакциясе, район баш­карма комитеты, кайбер авыл җирлекләре зур активлык күрсәттеләр.

Һәр коллектив билге­ле берәр терлекчелек ко­плексына, фермерларга беркетелде. Хәзерләгән яшел азыкны алар шун­да тапшыралар. Сүз дә юк, күп хезмәт куеп җыелган витаминлы азыкны тиешенчә фай­далану да зарур. Әйтик, Түбән Биктимер авы­лында кәҗә фермасы тотучы Нина Агапова үзенә тапшырыла тор­ган яфрак азык өчен бик рәхмәтле булуын, аны теләп куллануын әйтә.

– Кәҗәләр дә, боза­улар да кышын яфрак себеркеләрен яратып ашыйлар. Чыбыгына кадәр ботарлыйлар. Алларында яфрак азык торган кәҗәләрем сөтне дә күбрәк бирә, продук­ция дә сыйфатлы була. Малларның сәламәтлеге өчен дә файдалы мон­дый азык, – ди ул.

 Район ветеринария берләшмәсе баш табибы Ка­мил ХӘЙРУЛЛИН сөйләгәннәрдән:

– Без шәхси хуҗалык тотучыларга да, фермерлар­га, терлекчелек коплексларына да һәр бозауга кимендә биш пар яфрак себеркесе хәзерләргә киңәш итәбез. Бу бит җәйге чорда бер авырлыксыз диярлек хәзерләнә торган витамин запасы. Бозау тугач та аның алды­на яфрак себеркесе элеп куйсаң, ул коры яфракларны тәмләп ашый башлый. Ә моның яшь малның саулыгына уңай йогынтысы биниһая. Киптерелгән яфрак азыкта барлык витаминнар саклана. Бигрәк тә юкә, чикләвек агачларыннан хәзерләнгән яфрак себеркеләренең кыйммәте зур. Шулай ук дару үләннәре белән запасла­ну да мөһим. Әйтик, ат кузгалагы яшь терлекләрнең эче йомшарганда бик файдалы. Дару препаратлары бит шактый кыйммәт. Ә төрле үләннәрне җыеп кип­тереп кую зур хезмәт тә, чыгымнар да сорамый.

Гомер-гомергә авыл кешесе маллары өчен кышка яфрак азык хәзерләгән. Табигатьнең бу байлыгын ва­кытында җыеп калырга, аннан тиешенчә файдала­нырга кирәк.