Әлки районына сигез район халкының сөте җыела

 Сөтне башта үзебезнең район хал­кыннан җыелганын гына кабул итеп, фильтрлар аша үткәреп, суытып эшкәртүчеләргә озата­лар. Авылларда халык тапшырган әз-мәз сөт белән мәшәкатьләнергә теләмәүчеләр тирә-юнь районнарда да була. Нәтиҗәдә хәзер һәр иртә таңнан эшмәкәр Дамир Шәйхетдиновның сөт ма­шиналары сигез районга чыгып китә. Алар теләсә нинди һава торышында, ялга, бәйрәмнәргә кара­мый, берничә дистә авыл халкы тапшырган сөтне җыеп кайталар.

Бүген инде Дамир әфәнденең сөт кабул итү пункты җиһазланышы, эшнең оештырылуы нисбәтеннән иң за­манча таләпләргә җавап бирерлек. Без предприятиенең баш бухгалтеры Гөлсинә Шәкүрова белән сөт ка­бул итү пунктына үзенә күрә экскурсия ясадык.

Бу яңа төзелгән зур бина. Тышыннан ук бик матур эшләнгән. Ә эчкә үткәч затлылык, хезмәтне оештыру өчен гаять уңайлы шартлар тудырылуы һәркемне сокландырырлык.

Биредә сөт кабул итүчеләргә дә, аны тап­шыручыларга да бик җайлы. Сөт тапшыру өлешен бухгалтерия, ла­боратория якларыннан зур пыяла тәрәзәләр аера. Нәфис матур ишекләрне ачып, Гөлсинә Шәкүрова һәр бүлмә белән таныш­тыра бара. Монда эш кабинетлары да, ял, чәй эчү яклары да зиннәтле кунакханәләрнеке сы­ман ясалган.

–Безнең Дамир Әсхәтович бик тә матур­лыкны, пөхтәлекне яра­та,–дип тә өстәп куя баш бухгалтер.

Ул да түгел, зур кап­ка ачылып, бина эченә машиналары белән авыллардан сөт тапшы­ручылар тула башлады. Һәр машина әрҗәсендә бер үк төрле диярлек сөт мичкәләре. Аларын Да­мир Әсхәт улы үзе сатып алып өләшкән. Мондый савытларга сөтне җыярга да җайлы, продукциянең сыйфатына да хилафлык килми.

Менә сөт китергән егетләр бер-бер артлы продукцияләрен анализ­га тапшыра башладылар. Лаборант кызлар Рәзидә Галәүова һәм Алия Зиннәтуллина шунда ук заманча приборлар ярдәмендә сөтнең май­лылыгын ачыклый, кис­лоталылыгын билгели.

–Сөтнең сыйфаты ничек соң? – дип мин дә алардан кызыксынам.

–Әлегә көннәр сал­кын тора, сөтләр дә бик сыйфатлы килә. Безнең сөт җыючы егетләр про­дукцияне ничек бар шу­лай китереп җиткерәләр инде. Халык та сыйфат­лы сөт тапшырсын иде,– ди Рәзидә Галәүова.

Берникадәр вакыт­тан соң бу бина инде чит районнардан продукция җыеп кайткан сөт маши­налары белән тулачак. Ә лаборатория тәүлек әйләнәсе диярлек эшли. Әлеге кызларга алмашка лаборантлар Миләүшә Сәмигуллина һәм Чемен Латфуллина киләчәк.

Биредә тупланган сөт, сортларга бүленеп, зур-зур мичкәләргә ту­тырыла. Аннан инде продукция, сыйфа­тына карап, машина­лар белән эшкәртүче предприятиеләргә оза­тыла. Авыл сөте моннан Башкортстанга, Чуаш­станга, Пенза, Әстерхан якларына китә.

Дамир Әсхәтович белән сөйләшкәндә: “Нигә сөтне шулай ерак илтәсез, якында гына урнаштырып булмый­мы?” дип сораган идек. Ул моңа: “Сөтне ерак­карак иткән саен аның бәясе дә арта. Шоферлар да хезмәт хакын күбрәк ала”,–дип җаваплады.

Халыктан җыелган сөтнең литры да әрәм булмасын, исәп-хисап төгәл барсын өчен биредә бик җаваплы бухгалтер кызлар эшли. Диана Кәримова, Алсу Сәлахова, яшь кенә бул­салар да, хезмәтләрен зур җаваплылык белән, күңел биреп башкара­лар. Китерелгән сөтне Марат Галиуллин кабул итә. Үз эшен чын оста­ларча алып бара бу егет. Сөтне тапшыргач, аның савытларын махсус урында кайнар су, пар белән юдырып, сафлан­дырып алалар. Бу эшне Айдар Фәсхетдинов башкара.

Менә шушы кечкенә генә коллектив кыш­кы айларда һәр көнне 50 шәр тонна, җәен 100 тоннага чаклы сөтне кабул итеп, беренчел эшкәртеп, заводларга озатып торалар.