Әлки районының Хузангай авылында көн саен 50 тонна сөт эшкәртергә сәләтле май-сыр заводы эшли башлады

Фоторепортаж

     Кибетләргә керсәң, сатуда сырның ниндие генә юк. Сайла­нып-сайланып сатып алып, өйдә авыз итә башлагач, кайвакыт аның сыйфаты бөтенләй шиккә төшерә, “нәрсәдән эшләнде икән бу сыр?” дип аптырап та куясың. Инде без чын сырның нинди булырга тиеш икәнен дә онытып барабыз бугай.

Күптән түгел район үзәгендәге “Хузангай” җәмгыяте кибетләренең берсенә кергәч, үзебездә яңа завод­та җитештерелгән сырны сорап ал­дым. Әйе, моның тәме шул зур су­пермаркеттагы арзанлы сырлардан күпкә аерыла – авызда эреп тора.

Менә шул сыр ясала торган за­водта без кунакта бүген. Завод җитәкчесе Артем Мукусев биредә предприятиегә нигез салынганнан бирле эшли. Ул безгә әлеге тәмле нигъмәтне җитештерү серләрен ачты.

            Завод терлекчелек комплек­сы белән янәшә төзелгән. Димәк, җитештерүгә яңа савылган сөт кенә килә.

Заводка кергән сөтне иң элек анализга алып тикшерәләр. Сыр өчен бары сыйфатлы продукция генә яраклы. Лаборант Гөлфизә Әхмәтҗанова китерелгән һәр партия сөтнең төгәл сыйфатын билгели. “Безгә һәрчак яңа са­вылган яхшы сөт кенә килә”,–ди ул. Гөлфизә заманында Чиябаш мәктәбендә укыткан. Әлеге мәктәп башлангыч итеп калдырылгач, ул “Звениговский” комбинатына ба­рып өйрәнүләр уза һәм лаборант һөнәрен үзләштерә. Хәзер алар ире Илсур белән һәр иртәдә вах­та машинасында “Хузангай”га эшкә киләләр. Илсур терлекчелектә хезмәт куя.

Завод җитәкчесе Артем Му­кусев безгә сөтнең сыр булып җитешкәнче нинди юллар үтүен күрсәтә. Зур чаннарга бушатылган сөт (алар берьюлы 50 тонна продук­ция кабул итәргә исәпләнгән) шун­да пастеризацияләнә. Аннан бакто­фуга аша үтә. Ягъни сөт кирәкмәгән зарарлы бактерияләрдән чистарты­ла.

Инде сыйфаты тагын да яхшыр­тылган продукция чаннарга оза­тыла, һәм биредә аңа оеткы салы­на. Шунда сөттән сыр гранулалары ясалу процессы башлана. Безнеңчә әйтсәк, сөт эремчеккә әйләнә. Һәр төр сырның үз оеткысы һәм өлгерү вакыты бар.

               Менә безнең күз алдында Дмит­рий Жаринов, Валерий Кашкаров , Сергей Власов шул сыр гранулала­рын формаларга тутыралар. Ягъни түгәрәк тимер әрҗәләргә тигезләп салалар. Аннан аның суы сыркы­сын өчен билгеле бер вакыт бирелә. Шуннан формалардагы масса­ны пресс астына куялар. Баштагы сәгатьтә ул җиңелрәк, аннан авыр­рак йөк белән бастырыла.

                Инде сыр формасына кергән түгәрәкләрне янәшә бүлмәгә тозлыклы тирән зур савытларга озаталар. Монда алар ике тәүлек тотыла. Аннан суы сыркытылган сырны пакетларга төреп, кирәкле мәгълүматларны язып, махсус зур залга тезәләр. Биредә сыр тәмам өлгереп җитәргә тиеш. Нинди төрдән булуына карап, бу залда продукция 30 дан 60 тәүлеккәчә сак-лана. Шуннан соң ул сәүдә нокталарына озатыла. Монда­гы сырның күплегенә хәйран калырсың – 84 тонна. Әлкидә җитештерелгән әнә шулкадәр про­дукция өлгереп килә.

           Заводта “Голландский”, “Россий­ский”, “Тильзитер”, “Гауда”, “Эдам” сырлары җитештерелә. Тиздән үз заводлары бренды булырлык “Ху­зангайский”, “Советское качество”, “Из Мари Эль”, “Традиция СССР”, “Звениговка” исемле сырлар да ясый башлаячаклар.

               Тиздән завод көн дә 50 тоннага якын сөт эшкәртә башлаячак. Мон­да шулай ук югары сортлы “Кре­стьянское”, “Традиционное” акмай­лары эшләп чыгару күздә тотыла.

Реклама хокукында.