Әлки районында Бөтендөнья хезмәтне саклау көне уңаеннан төрле чаралар үткәреләчәк

Басуларда язгы кыр эшләре башланды. Бу чорда авыл хуҗалыгында хезмәтне саклауга, хәвефсезлек техникасын үтәүгә аеруча җитди игътибар бирелергә тиеш. Механизаторлар, язгы кыр эшләрендә катнашучы бүтән эшче һәм белгечләр белән даими төстә инструктаж үткәрү зарур. Эш урынында кешенең саулыгына һич кенә дә зыян салынмасын өчен һәр җирдә хәвефсезлек кагыйдәләрен төгәл үтәү таләп ителә. Техника тирәсендә, ашламалар белән эш иткәндә аеруча сак булу сорала. Шуңа да Бөтендөнья хезмәтне саклау көне уңаеннан хуҗалыкларда әңгәмәләр, "түгәрәк өстәл"ләр, төрле күргәзмә һәм семинарлар үткәрү бик мөһим.