Талип Яруллин хөрмәтенә турнир

Көрәш белән чын-чынлап шөгыльләнүче ир-егетләр күп бездә. Аларның кайберләре инде мәйданнан китте, олыгайды. Әмма өлкәннәр урынын көрәш келәмендә, Сабантуй мәйданында үсмерләр, яшь егетләр ала. Әнә шулай буыннан-буынга традицияләр күчә, батыр урыны буш тормый.
Ләкин милли көрәшне тагын да популярлаштыру өчен тиешле игътибар, матди чыгымнарны күтәрерлек фидакарьләр кирәк. Шундыйларның берсе - тамырлары безнең яктан булган, хәзер Казанда яшәүче эшмәкәр Илсур Шәүкәт улы Гайнетдинов белән күптән түгел көрәш турында сөйләшеп тордык, данлы көрәшчеләр Рәшит Сәмигуллинны, Фердинат Шәйхетдиновны, Фәракшин Илсур белән Илмирне, Әхмәтшин Тәлгатьне телгә алдык, Яруллин Талип абыйны искә төшердек. Шунда Илсур тәкъдим кертте: "Әйдә, Талип абый хөрмәтенә зур ярышлар оештырабыз",- диде. Бу тәкъдимне район җитәкчелеге дә хуплады.
Әйткән сүз - аткан ук. Татарча көрәш буенча Талип Яруллин хөрмәтенә ачык турнир үткәрүне 20 мартка тәгаенләдек. Турнирның максаты - татар-башкорт көрәшен пропагандалау һәм иң көчле спортчыларны ачыклау. Ярышларга 1995-98 нче һәм 1999-2003 нче елларда туган егетләр һәм үсмерләр чакырыла. Турнирны үткәрү чыгымнарын Илсур Гайнетдинов үз өстенә алачак. Ярышларда Саба, Нурлат, Аксубай, Чирмешән, Алексеевск, Чистай, Спас, Балык Бистәсе, Лаеш һәм Биектау районнары көрәшчеләре катнашыр дип көтелә. Шулай ук үз эшен әйбәт белгән гадел хөкемдарлар да чакырылачак. Һәрхәлдә, әзерлек эшләрен башлап җибәрдек, ярышларны уңышлы оештыра алырбыз, ә безнең егетләр турнирда актив катнашып, атаклы көрәшчеләребезгә лаеклы алмаш икәнлекләрен җиңүләре белән раслар дип ышанабыз.